Shiv Thakrey New Salon Open : मराठी मनोरंजनविश्वातील लोकप्रिय चेहरा शिव ठाकरे पुन्हा एकदा चर्चेत आला आहे. याने आता आपल्या करिअरमध्ये एक नवीन वळण घेतलं आहे. अभिनय आणि रिअॅलिटी शोमधून प्रेक्षकांची मनं जिंकलेल्या शिवने यावेळी व्यवसाय क्षेत्रात पाऊल टाकत चाहत्यांना एक खास सरप्राइज दिलं आहे. गुढीपाडव्याच्या शुभदिनी त्याने आपल्या स्वप्नातील व्यवसायाची सुरुवात केली. अमरावतीमध्ये त्याने स्वतःचं आकर्षक सलून सुरु केलं आहे.
शिवने सुरु केलेल्या नव्या सलूनचं नाव “Amraa Studio Salons” असं ठेवण्यात आलं आहे. गेल्या काही दिवसांपासून या सलूनच्या तयारीचे व्हिडीओ आणि अपडेट्स तो सोशल मीडियावर शेअर करत होता. ज्याने चाहत्यांमध्ये देखील खूप उत्सुकता होती. अखेर शिवचं स्वप्न पूर्ण झालं आहे आणि शुभ मुहूर्त साधत त्याने त्याच्या सलूनचं उद्घाटन केलं. या नव्या प्रवासाबद्दल बोलताना शिवने आपले भावनिक विचारही व्यक्त केले. त्याने सांगितलं की, या सलूनला त्याने अत्यंत प्रेमाने आणि जिव्हाळ्याने उभं केलं आहे. त्याच्या मित्रांनी आणि संपूर्ण टीमने दिलेलं सहकार्य त्याच्यासाठी अमूल्य ठरलं.
आणखी वाचा – मराठमोळ्या अभिनेत्याने सुरु केला नवा व्यवसाय, पारंपरिक व्यवसायाने जिंकली मन, कलाकारांनीही केलं कौतुक
पैशांपलीकडे जाऊन त्यांनी हा प्रोजेक्ट स्वतःचा मानून काम केल्याचंही त्याने नमूद केलं. विशेष म्हणजे, आजीच्या आशीर्वादाने ही नवी सुरुवात होत असल्याने त्याच्यासाठी हा क्षण अधिकच खास ठरला. शिवच्या या नव्या उपक्रमाला मराठी आणि हिंदी मनोरंजनसृष्टीतील अनेक कलाकारांनी शुभेच्छा दिल्या आहेत. त्याचबरोबर चाहत्यांकडूनही त्याच्यावर कौतुकाचा वर्षाव होत आहे. एकंदरीत, छोट्या पडद्यावर आपली ओळख निर्माण केल्यानंतर आता व्यवसायातही स्वतःची छाप पाडण्यासाठी शिव ठाकरे सज्ज झाला आहे. शिवने शेअर केलेल्या फोटो आणि व्हिडीओवर अनेक कलाकार आणि चाहत्यांकडून शुभेच्छांचा वर्षाव झाला.
