मराठी कलाविश्वात ज्येष्ठ अभिनेते सतीश जोशी यांनी काल (१२ मे रोजी) अखेरचा श्वास घेतला. मराठी कलाविश्वातून सतीश यांच्या निधनाची दुःखद बातमी समोर आली आहे. रंगोत्सवात व्यासपीठावरच सतीश जोशी यांनी अखेरचा श्वास घेतला, अशी माहिती त्यांचे मित्र राजेश देशपांडे यांनी दिली. त्यांच्या निधनाच्या बातमीमुळे अनेकांना धक्का बसला आहे. (Satish Joshi Passed Away)
राजेश देशपांडे यांनी त्यांच्या अधिकृत फेसबुक अकाउंटवरून सतीश यांच्या निधनाची बातमी चाहत्यांसह शेअर केली. सतीश जोशी यांचा फोटो शेअर करत त्यांनी लिहिलं, “आमचे ज्येष्ठ मित्र अभिनेते सतीश जोशी यांचे आज रंगोत्सवात स्टेजवरच दुःखद निधन झाले. निधनापूर्वी त्यांनी अभिनयपण केला होता. ओम शांती ओम”. सतीश जोशी यांना देखील रंगभूमीवरच देवाज्ञा झाली. ‘सृजन द क्रिएशन’ या संस्थेच्या चौथ्या वर्धापन दिनानिमित्त एक कार्यक्रम सुरु होता. या कार्यक्रमात सतीश जोशी देखील सहभागी झाले होते. सृजनोस्तव या रंगोत्सवाचा कार्यक्रम सुरु असतानाच त्यांचे निधन झाले.
अभिनेते अतुल काळे यांनी त्यांच्या सोशल मीडियावर पोस्ट शेअर करत सतीश यांना श्रद्धांजली वाहिली आहे. त्यांचा एक फोटो शेअर करत, “जोशी गुरुजी यांचं आज निधन झालं. त्यांनी मला आणि माझ्या कुटुंबाला खूप सपोर्ट केला होता. त्यांच्या आत्म्याला शांती लाभो. ओम शांती”.
सतीश जोशींनी अनेक चित्रपट, मालिका, नाटकांमध्ये महत्वाच्या भूमिका साकारल्या होत्या. ‘झी मराठी’ वाहिनीवरील ‘भाग्यलक्ष्मी’ या मालिकेतील त्यांच्या भूमिकेला विशेष लोकप्रियता मिळाली. ‘यशोदा गोष्ट श्यामच्या आईची’ या मालिकेत ते शेवटचे झळकले. दिग्दर्शक विरेंद्र प्रधान यांच्या बहुतेक मालिकांमध्ये त्यांनी काम केलं होतं.
