अभिनेत्री मृणाल हिने मराठी मालिका विश्वात आपल्या अभिनय कौशल्याने स्वतःचं असं स्थान निर्माण केलं. अनेक मराठी मालिकांमधून मृणालने रसिक प्रेक्षकांच्या मनावर राज्य केलं. मृणाल ही मराठी विश्वातील लोकप्रिय अभिनेत्री असून प्रेक्षकांच्या लाडक्या अभिनेत्रींच्या यादीतील एक आहे. मात्र चार वर्षांपासून मृणाल मालिका विश्वात कुठेही दिसली नाही. लग्नानंतर मृणालने मालिका विश्वातून ब्रेक घेतलेला पाहायला मिळाला. मृणालनं नीरजसह लग्नगाठ बांधल्यानंतर ती कायमची अमेरिकेत स्थायिक झालेली पाहायला मिळाली. त्यामुळे मृणालला भारतातील प्रेक्षक खूप मिस करताना दिसले. (Mrunal Dusanis Comeback)
मृणालने पुन्हा मालिकविश्वात यावं अशी अपेक्षाही तिच्या चाहत्यांनी वेळोवेळी कमेंट्सद्वारे केलेली पाहायला मिळाली. आता या प्रेक्षकांच्या इच्छेखातर मृणाल पुन्हा एकदा भारतात परतली असल्याचे पाहायला मिळते. मृणाल चार वर्षानंतर पुन्हा भारतात परतली असून ती आता मालिकाविश्वात पुन्हा काम करण्यास सज्ज होणार असल्याचा खुलासा तिने नुकत्याच दिलेल्या मुलाखतीदरम्यान केला. मृणालने नुकतीच ‘मज्जा पिंक’ या युट्युब चॅनेलला मुलाखत दिली. मदर्स डे स्पेशल दिलेल्या मुलाखतीत मृणाल व तिची लेक नूरवी हिचा गोड अंदाज पाहायला मिळाला. मृणाल आता सहकुटुंब भारतात परतली असून लवकरच ती कामाला सुरुवात करणार असल्याचा खुलासा तिने केला आहे.
यावेळी बोलताना मृणाल म्हणाली, “मला टेलिव्हिजन करायला आवडेल. मी चांगल्या कामाची वाट बघतेय. मी टेलिव्हिजन नक्कीच करणार आहे. आणि नंतर चित्रपट, नाटक या गोष्टी हळूहळू वेळेनुसार सुरु करणार आहे. नाही म्हटलं तरी चार वर्षांचा गॅप झाला आहे. त्यामुळे आता मी लवकरच कामाला सुरुवात करणार आहे. आणि नुरवी आता दोन वर्षांची झाली आहे. तिला बऱ्यापैकी समज आली आहे. मी सव्वा महिन्याची असताना माझ्या आईने कामाला सुरुवात केली. आता मलाही असं वाटतंय की मी कामाला सुरुवात करु शकेन. आणि इकडे माझं कुटुंब, पालक आहेत जे तिच्याकडे लक्ष ठेवू शकतील. काम करणार हे नक्की”.
आता मृणाल नक्की कोणत्या वाहिनीवर दिसणार. कोणत्या मालिकेतून प्रेक्षकांच्या भेटीला येणार याकडे साऱ्यांच्या नजरा लागून राहिल्या आहेत. मृणालचा हा कमबॅक पाहण्यासाठी तिचे चाहते उत्सुक आहेत.
