मराठी कलाविश्वात गेल्या काही वर्षांपासून थोर समाजसेवक व महापुरुषांवर आधारित अनेक चित्रपट, मालिका प्रेक्षकांसमोर येत आहे. त्यामध्ये आता एका चित्रपटाचा समावेश होत आहे. ‘समाजातील प्रत्येक स्त्री सुशिक्षित झालीच पाहिजे’ असा आग्रह ज्यांनी केला ते महात्मा ज्योतिराव फुले आणि त्यांच्या खांद्याला खांदा लावून ज्यांनी स्त्री शिक्षणाचा पाया रचला त्या सावित्रीबाई फुले यांच्या जीवनावर आधारित एक नवा चित्रपट येत आहे. ‘सत्यशोधक’ असं या चित्रपटाचं नाव असून ज्याचं दिग्दर्शन निलेश जळमकर यांनी केलं आहे. काही दिवसांपूर्वी चित्रपटाचं टीझर प्रदर्शित झालं होतं. आता चित्रपटाचं फर्स्ट लुक पोस्टर समोर आलं आहे. ज्यामध्ये प्रसिद्ध मराठी अभिनेता संदीप कुलकर्णी महात्मा ज्योतिराव फुले यांची भूमिका साकारताना दिसणार आहे. (Satyashodhak movie first look out)
समाजाचा प्रचंड विरोध असतानाही स्त्रियांच्या शिक्षणासाठी जे शेवटपर्यंत झटले, त्या महात्मा फुले आणि सावित्रीबाईंचा जीवन प्रवास आता मोठ्या पडद्यावर उलगडणार आहे. काही दिवसांपूर्वी निर्मात्यांनी चित्रपटाचं टीझर प्रदर्शित केलं, तेव्हा यात महात्मा ज्योतिराव फुलेंचा चेहरा दाखवण्यात आला नव्हता. त्यामुळे महात्मा फुले यांची भूमिका कोण साकारणार? याची प्रेक्षक आतुरतेने वाट पाहत होते. आता या चित्रपटातील मध्यवर्ती भूमिकेचा फर्स्ट लुक समोर आला. अभिनेता संदीप कुलकर्णी महात्मा ज्योतिराव फुलेंची भूमिका साकारताना दिसणार आहे.
चित्रपटाच्या निर्मात्यांनी सोशल मीडियावर चित्रपटाचा फर्स्ट लुक प्रदर्शित केला. ज्यामध्ये संदीप कुलकर्णी महात्मा ज्योतिराव फुले यांच्या रूपात अगदी हुबेहूब दिसतात. त्यांना पाहून समोर साक्षात ज्योतिरावचं उभे आहेत का, असा भास होतो. “गुलामगिरीच्या अंधारात जेव्हा अन्यायाचा अतिरेक होत होता, तेव्हा झाला होता उदय एका थोर क्रांतिसूर्याचा. ‘सत्यशोधक’ ५ जानेवारीला तुमच्या जवळच्या सिनेमागृहात आम्ही घेऊन येत आहोत.”, असं या कॅप्शनमध्ये म्हटलं आहे.
हे देखील वाचा – सोनाली कुलकर्णी यांचे आई-वडील मराठी चित्रपटसृष्टीमध्ये पदार्पण करणार, फोटोंची सोशल मीडियावर चर्चा
या चित्रपटात संदीप यांच्यासह अभिनेत्री राजश्री देशपांडे, गणेश यादव, सुरेश विश्वकर्मा, रवींद्र मनकनी व अन्य कलाकार झळकणार आहेत. निलेश जळमकर लिखित-दिग्दर्शित हा चित्रपट नवीन वर्षी ५ जानेवारी २०२४ रोजी प्रदर्शित होणार आहे.
