झी मराठी वाहिनीवरील ‘सातव्या मुलीची सातवी मुलगी’ ही मालिका प्रेक्षकांचे चांगलेच मनोरंजन करत आहे. या मालिकेतील अनेक नवनवीन ट्विस्ट्स या मालिकेविषयी चाहत्यांमध्ये उत्सुकता निर्माण करत आहे. या मालिकेचे कथानक त्रिनयना व विरोचक यांच्यातील युद्धावर आधारित आहे. मालिकेतील अनेक ट्विस्टमुळे व खिळवून ठेवणाऱ्या कथानकामुळे ही मालिका बघण्याचा प्रेक्षकांचा कल वाढत आहे.
अशातच या मालिकेत नेत्रानेअस्तिकाचा खून केल्याचा नवीन ट्विस्ट पाहायला मिळाला. अद्वैतचे लक्ष नसताना अस्तिका एका धारदार शस्त्राने अद्वैतचा जीव घेण्याचा प्रयत्न करते. मात्र, इतक्यात नेत्रा येते व त्याचा जीव वाचवते आणि या प्रयत्नांत नेत्राच्या हातून अस्तिकाचा अंत होत असल्याचा प्रोमो नुकताच पाहायला मिळाला. यानंतर आता यात आणखी एक नवीन ट्विस्ट आला आहे तो म्हणजे नेत्रा विरोचकाचाही वध करते.
आणखी वाचा – पारूच्या जीवाला होणाऱ्या नवऱ्यापासून धोका, दिशा व दामिनीचा डाव होणार का सफल?, मालिकेत नवा ट्विस्ट
नुकताच या ट्विस्टबद्दल उत्सुकता निर्माण करणारा प्रोमो प्रदर्शित करण्यात आला आहे. या व्हिडीओमध्ये विरोचक नेत्रासमोर अद्वैतला जीवे मारण्याची धमकी देते. उभाच्या उभा चिरून काढणार आहे याला असं म्हणत ती त्याचा गळा धरते आणि त्याचं जीव घेण्याचा प्रयत्न करते. यावर तिला सोडण्यासाठी घरातली सगळे मंडळी धावून येतात. मात्र विरोचकाला कुणीही सोडवू शकत नाही. विरोचकाने अद्वैतचा गळा पकडल्यामुळे त्याचा जीव अस्वस्थ होतो.
अद्वैतला अस्वस्थ झालेला पाहून नेत्राला राहवत नाही आणि ती विरोचकाच्या गळ्यावरून चाकू फिरवत तिचा वध करत. त्यानंतर विरोचक जमिनीवर कोसळल्याचे यामध्ये पाहायला मिळत आहे. त्यामुळे आता विरोचकाचा खरंच अंत झाला आहे का? तिच्या जाण्यामुळे आता मालिकेत आणखी नवीन ट्विस्ट काय येणार? यासाठी प्रेक्षक आतुर आहेत. त्याचबरोबर विरोचकाचा अंत झाल्यामुळे आता नेत्रा-अद्वैतवर तसेच मालिकेच्या कथानकावरही काय परिणाम होणार? याची प्रेक्षकांना उत्सुकता लागून राहिली आहे.
