छोट्या पडद्यावरील ‘सारगेमप लिटिल चॅम्प्स’ या लोकप्रिय कार्यक्रमातून घराघरांत पोहोचलेले गायक-गायिका म्हणजे मुग्धा वैशंपायन व प्रथमेश लघाटे. सध्या मनोरंजन सृष्टीत लग्नाचे वारे वाहत आहेत. अशातच मुग्धा-प्रथमेश यांच्या लग्नाच्या तयारीलादेखील सुरुवात झाली आहे. गेले काही दिवस यांच्या लग्नाच्या अनेक चर्चा सोशल मीडियावर रंगत होत्या. मात्र आता ही जोडी लवकरच विवाहबंधनात अडकणार असून त्यांच्या लग्नाआधीच्या विधींना सुरुवात झाली आहे. काल (बुधवार) नुकताच यांचा हळदी सोहळा करण्यात आला. अशातच आता त्यांच्या ग्रहमख सोहळ्याचे काही फोटोसुद्धा समोर आले आहेत. (Mugdha Vaishampayan On Instagram)
एखाद्या मंगल कार्यासाठी नवग्रहांची अनुकूलता मिळवण्यासाठी ग्रहमख हा विधी करण्याची पद्धत असते. या ग्रहमख सोहळ्यासाठी मुग्धाने खास निळ्या रंगाची पैठणी साडी नेसली होती. लग्नाच्या एक किंवा दोन दिवस आधी हा विधी घरच्या घरी करण्यात येतो. याचे काही खास फोटो मुग्धाने इन्स्टाग्रामद्वारे शेअर केले आहेत. गायिकेच्या घरी लग्नानिमित्त फुलांची सुंदर अशी सजावट व आकर्षक रोषणाईदेखील करण्यात आल्याचं या फोटोंमध्ये पाहायला मिळत आहे.
आणखी वाचा – Video : “माझ्या आईनेच दुसरा ‘शोले’ बनवला”, क्रांती रेडकरच्या आईचा मजेशीर व्हिडीओ, तुम्हीही पोट धरुन हसाल
मुग्धाने शेअर केलेल्या या खास फोटोंमध्ये ती भलतीच आनंदी असल्याचे पाहायला मिळत आहे. तिच्या या फोटोंना नेटकऱ्यांनीदेखील लाईक्स व कमेंट्स करत उत्तम प्रतिसाद दिला आहे. तिच्या अनेक चाहत्यांनी या फोटोवर ‘याला म्हणतात अस्सल मराठमोळे लग्न, मुग्धा किती गोड दिसत आहेस, सुंदर, खूपच छान” अशा अनेक कमेंट्स करत तिचं कौतुक केले आहे. तसेच तिला व प्रथमेशला लग्नानिमित्त शुभेच्छादेखील दिल्या आहेत.
दरम्यान, मुग्धा-प्रथमेश ही जोडी ‘सारेगमप लिटिल चॅम्प्स’ या शोमुळे एकत्र आली. या शोमुळे त्यांच्यात ओळख झाली. पुढे त्यांच्या दोघांचे एकत्र गाण्याचे कार्यक्रम सुरू झाले आणि हे एकत्र कार्यक्रम करत असताना दोघांच्याही मनात एकमेकांविषयी प्रेमाची भावना निर्माण झाली. मग एके दिवशी त्यांनी सोशल मीडियावर ‘आमचं ठरलंय’ असं म्हणत एकमेकांच्या प्रेमाची कबुली दिली होती आणि आता अखेरीस ही जोडी लवकरच विवाहबंधनात अडकणार आहे.