मराठा आरक्षणासाठी पुकारलेल्या उपोषण आंदोलनमुळे मनोज जरांगे पाटील यांचे नाव महाराष्ट्राच्या कानाकोपऱ्यात पोहोचले. मनोज जरांगेंच्या याच जीवनप्रवासाचे चित्रण करणारा ‘संघर्षयोद्धा- मनोज जरांगे पाटील’ हा चित्रपट येत्या १४ जूनला प्रदर्शित होणार आहे. गेल्या काही दिवसांपासून या चित्रपटाची सोशल मीडियावर प्रचंड चर्चा रंगली आहे. या चित्रपटाच्या पहिल्या ट्रेलरला प्रेक्षकांकडून तुफान प्रतिसाद मिळाला. अशातच आता या चित्रपटाचा आणखी एक प्रोमो प्रेक्षकांच्या भेटीला आला आहे.
गेल्या अनेक महिन्यांपासून मराठा आरक्षणासाठी मनोज जरांगे पाटील आक्रमक भूमिका मांडत आहेत. मात्र, मराठा समाजाला ओबीसी प्रवर्गातून आरक्षण देण्यास छगन भुजबळ यांनी विरोध केला, तर ॲड. गुणरत्न सदावर्ते मराठा आरक्षणाच्या विरोधात असल्याचे पाहायला मिळाले. त्यामुळे या चित्रपटातील छगन भुजबळ व गुणरत्न सदावर्ते यांच्या भूमिका कोण करणार? याची सर्वांना उत्सुकता लागून राहिली होती आणि ही इच्छा पूर्ण झाली आहे.
आणखी वाचा –
या चित्रपटाचा दुसरा ट्रेलर नुकताच सोशल मीडियावर प्रदर्शित करण्यात आला असून, छगन भुजबळ यांची भूमिका अभिनेते संजय कुलकर्णी यांनी साकारली आहे तर ॲड. गुणरत्न सदावर्ते यांची भूमिका शिवाजी दोलताडे यांनी साकारली आहे. त्यांच्या या भूमिकांनी सर्वांचेच लक्ष वेधून घेतलं आहे. मराठा आरक्षणात छगन भुजवळ व ॲड. गुणरत्न सदावर्ते यांच्या प्रत्येक भूमिकेकडे अवघ्या महाराष्ट्राचे लक्ष होते. त्यामुळे आरक्षणासाठी आग्रही भूमिका, आरक्षणावरील आक्षेप, विरोध असा संघर्षही या चित्रपटात पाहायला मिळणार आहे.
आणखी वाचा –
दरम्यान, ‘संघर्षयोद्धा’ या चित्रपटात अभिनेता रोहन पाटील याच्यासह संदीप पाठक, सागर कारंडे, अरबाज शेख, ज्येष्ठ अभिनेते मोहन जोशी, श्रीनिवास पोकळे, संजय कुलकर्णी, सुरभी हांडे, माधवी जुवेकर, विजय मिश्रा, विनीत भोंडे, सुनील गोडबोले, माधव अभ्यंकर, सोमनाथ अवघडे , किशोर चौगुले , सिद्धेश्वर झाडबुके, उर्मिला डांगे या कलाकारांनी महत्त्वाच्या भूमिका साकारल्या आहेत.