देशभरात गणेशोत्सवाचा उत्साह आहे. सार्वजनिक मंडळांसह अनेकांच्या घरी बाप्पाचे आगमन झाले. सध्या बॉलिवूडमधील अनेक कलाकार सार्वजनिक मंडळाच्या बाप्पाचे दर्शन घेताना दिसत आहे. त्याबरोबरच ते एकमेकांच्या घरी भेटी देत आहेत. राज्याचे मुख्यमंत्री एकनाथ शिंदे यांच्या वर्षा निवासस्थानी गणपती बाप्पा विराजमान झाले आहे. यावेळी त्यांच्या घरच्या बाप्पाचे दर्शन घेण्यासाठी बॉलिवूडच्या अनेक कलाकारांनी हजेरी लावली होती. मात्र सर्वात जास्त चर्चा झाली, ती ‘किंग खान’ शाहरुख खान आणि ‘भाईजान’ सलमान खान यांची. (Salman and Shahrukh visits CM Shinde House)
शाहरुख खान व सलमान खान रविवारी रात्री एकनाथ शिंदेंच्या बाप्पाचे दर्शन घेण्यासाठी त्यांच्या घरी पोहोचले होते. बाप्पाच्या दर्शनावेळी शाहरुखसह त्याची मॅनेजर पूजा ददलानी उपस्थित होती. तर सलमान बहीण अर्पिता व मेहुणा आयुष शर्माबरोबर आले होते. एकनाथ शिंदेंनी दोन्ही अभिनेत्यांचे शाल व पुष्पगुच्छ देत स्वागत केले. तर मुख्यमंत्र्यांचे पुत्र श्रीकांत शिंदे यांनी दोन्ही अभिनेत्यांना गणपती बाप्पाची मूर्ती भेट दिली. शाहरुखने निळ्या रंगाचा कुर्ता परिधान केला होता, तर सलमानने लाल रंगाचा कुर्ता परिधान करत हजेरी लावली होती. दोन्ही खानने एकनाथ शिंदेसह एकत्र फोटोशूट केले असून या भेटीचे फोटो सोशल मीडियावर व्हायरल होत आहे.
हे देखील वाचा – Parineeti Chopra Raghav Chadha Wedding : परिणिती चोप्रा व राघव चड्ढा अखेर अडकले विवाहबंधनात, फोटोज शेअर करत म्हणाली, “या प्रवासाला…”
मुख्यमंत्र्यांच्या बाप्पाचे दर्शन घेण्यासाठी सलमान, शाहरुखसह जॅकी श्रॉफ, अर्जुन रामपाल, आशा भोसले, बोनी कपूर, रश्मी देसाई, सुनील शेट्टी, पंकज त्रिपाठी, बिग बॉस विजेता एल्विश यादव, शहनाज गिल व अनेक कलाकारांनी हजेरी लावली होती. याआधी शाहरुख खान त्याच्या कुटुंबासह लालबागच्या राजाचे दर्शनासाठी पोहोचला होता. तर सलमानने एकनाथ शिंदेंसह बहीण अर्पिताच्या घरातील बाप्पाच्या दर्शनासाठी एकत्र आले होते.
हे देखील वाचा – ‘सुभेदार’नंतर दिग्पाल लांजेकर यांचा नवा चित्रपट, मोठ्या पडद्यावर अवतरणार छत्रपती संभाजी महाराजांचा पराक्रम
दोघांच्या कामाबाबत बोलायचे झाल्यास, शाहरुखचा ‘जवान’ चित्रपट बॉक्स ऑफिसवर घसघशीत कमाई करताना दिसत आहे. तर सलमान ‘किसी का भाई किसी की जान’ चित्रपटात शेवटला दिसला होता. तो लवकरच कतरिना कैफसोबत ‘टायगर ३’मध्ये दिसणार आहे.
