‘बाजीगर’, ‘इश्क’, ‘रेस’ यांसारख्या चित्रपटांमध्ये दिसलेले ज्येष्ठ अभिनेते दलीप ताहिल यांना २ महिन्यांच्या तुरुंगवासाची शिक्षा सुनावण्यात आली आहे. पाच वर्षांपूर्वी म्हणजेच २०१८ मध्ये, दलीप यांनी मद्यधुंद अवस्थेत मुंबईच्या खार भागात एका रिक्षेला धडक दिली होती, दरम्यान एक महिला जखमी झाली होती. (Dalip Tahil Jail)
२०१८ मध्ये, दलीप ताहिल यांच्यावर दारू पिऊन नशेत गाडी चालवण्याचा आणि रिक्षाला धडक दिल्याचा आरोप होता. ते दारूच्या नशेत गाडी चालवत होते आणि अपघात झाला. त्यावेळी ते पळून गेल्याचे तपासात समोर आले आहे. मात्र, वाहतूक कोंडीमुळे ते सुटू शकले नाहीत. घटनास्थळावरून त्यांना खार पोलीस ठाण्यात आणण्यात आले, तेथे ते मद्यधुंद अवस्थेत असल्याचे स्पष्टपणे दिसले. या पुराव्याच्या आधारे, ५ वर्षांनंतर त्यांना दंडाधिकारी न्यायालयात दोषी ठरवण्यात आले आणि त्यांना २ महिन्यांची शिक्षा सुनावण्यात आली आहे.
मागील वृत्तानुसार, दलीप ताहिल यांनी अपघातानंतर घटनास्थळावरून पळून जाण्याचा प्रयत्न केला होता, मात्र, गणेश विसर्जनामुळे ते गर्दीत अडकले आणि लोकांनी त्यांना पकडून कारमधून बाहेर काढण्याचा प्रयत्न केला असता तेथे उपस्थित असलेल्या लोकांशी त्यांची बाचाबाची झाली.
मुंबईतील खार पोलीस ठाण्याच्या निरीक्षकाने असे सांगितले होते की, दलीप ताहिल यांनी रक्त तपासणीसाठी नमुने देण्यास नकार दिला होता. पोलिसांनी अपघातात बळी पडलेल्या तिघांची वैद्यकीय तपासणी केली. यानंतर अभिनेता ताहिलला दारू पिऊन आणि निष्काळजीपणाने गाडी चालवल्याबद्दल अटक करण्यात आली होती, मात्र नंतर त्याची जामिनावर सुटका करण्यात आली होती.
दलीप ताहिल यांनी ‘बाजीगर’, ‘राजा’, ‘इश्क’, ‘रावन’, ‘कहो ना प्यार है’ तसेच ‘सोल्जर’ यांसारख्या अनेक हिट चित्रपटांमध्ये काम केले आहे.