Genelia Deshmukh comeback : ‘सितारे जमीन पर’च्या यशानंतर, जिनीलीया डिसोझाने तिच्या आगामी ‘ज्युनियर’ या चित्रपटासह मोठ्या पडद्यावर परतण्यास सज्ज होत आहे. अलीकडेच चित्रपटाच्या प्री-रिलीझ इव्हेंटमध्ये अभिनेत्रीने चित्रपट निर्माते एसएस राजामौली यांची भेट घेतली, जिथे दोघांनीही भावुक असा क्षण शेअर केला. तब्बल २१ वर्षांनंतर, पुन्हा री-युनियनचा एक व्हिडीओ सोशल मीडियावर व्हायरल झाला आणि चाहत्यांना त्यांच्या २००४ च्या ‘सई’ या चित्रपटाची आठवण आली. अभिनेत्रीने दाक्षिणात्य चित्रपटाच्या कार्यक्रमाला हजेरी लावली तेव्हा एस.एस. राजामौली यांनी तिचे भरभरुन कौतुक केलेले पाहायला मिळाले.
ज्युनिअर’ चित्रपटाच्या एका कार्यक्रमाला दिग्दर्शक, निर्मात राजामौलींनीही हजेरी लावली होती. त्यावेळी त्यांनी जिनीलीयाच्या तेलुगू इंडस्ट्रीतील पुनरागमनाबद्दल प्रतिक्रिया दिली आहे. ‘पिंकव्हिला साऊथ’च्या वृत्तानुसार, राजामौली जिनिलीयाला म्हणाले, “किती वर्षे झाले पण तू अजूनही तशीच दिसत आहेस. मी सिनेमॅटोग्राफर सेंथिलला विचारलं होतं की, आपल्याला नवीन जिनिलिया दिसेल का तर तोसुद्धा म्हणाला हो नक्कीच. त्यामुळे मी आतुरतेने तुझी वाट बघत आहे”.
आणखी वाचा – ‘पंचायत’च्या जावयाला हॉस्पिटलमधून डिस्चार्ज, हार्ट अटॅक आलाच नव्हता; स्वतःच केला खुलासा, म्हणाला…
जिनिलीया यावर म्हणाली, “तुम्ही खूप चांगले आहात सर माझ्यासाठी तुमचे हे शब्द फार महत्त्वाचे आहेत”. जिनिलीया शेवटचं ‘ना इश्तम’ या तेलुगू चित्रपटातून झळकली होती. त्यानंतर आता ती ‘ज्युनिअर’ चित्रपटातून तेलुगू इंडस्ट्रीत पुनरागमन करत आहे. जिनिलीयाने आजवर ‘बॉईज’, ‘सचिन’, ‘हॅपी’, ‘बोम्मारिल्लू’, ‘संतोष सुब्रमण्यम’, ‘उरुमी’ यांसारख्या अनेक दाक्षिणात्य चित्रपटांतून काम केलं आहे.
जिनीलीया आणि एस.एस. राजामौली यांनी ‘सई’ या चित्रपटात एकत्र काम केले. हा चित्रपट दोघांच्याही कारकिर्दीच्या सुरुवातीच्या टप्प्यातील मैलाचा दगड ठरला. ‘ज्युनियर’ चित्रपटाबद्दल बोलायचे झाले तर हा चित्रपट १८ जुलै रोजी प्रदर्शित होणार आहे. राधाकृष्ण रेड्डी दिग्दर्शित या चित्रपटात किरीटी रेड्डी, श्रीलीला आणि व्ही. रविचंद्रन यांच्यासह जिनीलीयाही महत्त्वपूर्ण भूमिकेत आहे. या चित्रपटासह जिनीलीया तेलगू सिनेमात पुनरागमन करीत आहे.
