Bigg Boss Marathi 6 update: ‘बिग बॉस’ मराठीच्या सहाव्या पर्वाने सुरुवातीपासूनच प्रेक्षकांचं लक्ष वेधून घेतलं आहे. पहिल्याच आठवड्यात घरातील वातावरण तापलेलं असतानाच, भाऊंचा धक्का हा प्रेक्षकांसाठी विशेष मनोरंजक ठरत असल्याचं दिसून येत आहे. या टास्कदरम्यान होस्ट रितेश देशमुख काही स्पर्धकांची चांगलीच शाळा घेताना दिसत आहेत, तर काही सदस्यांच्या खेळाचं कौतुकही करताना पाहायला मिळत आहे. या सिझनच्या पहिल्याच भाऊंच्या धक्क्यावर ‘काळू डॉन’ म्हणून ओळखला जाणारा प्रभू शेळके सर्वांच्या चर्चेचा विषय ठरला आहे.
रितेश देशमुख यांनी प्रभू शेळकेचं भरभरून कौतुक केल्याचं नव्या प्रोमोमध्ये पाहायला मिळत आहे. रितेश प्रभूला गमतीशीर अंदाजात म्हणतात, “तुम्ही प्रेक्षकांना गोट्यांचे नवनवीन प्रकार शिकवले,” यावर घरातील सर्व सदस्य हसताना दिसतात आणि घरात हलकाफुलका माहोल निर्माण होतो. पुढे रितेश देशमुख प्रभूला म्हणतात की, बाहेरच्या दुनियेत तुम्ही एका कॅमेऱ्यातून कंटेंट तयार करत होतात, मात्र इथे तब्बल शंभर कॅमेरे आहेत. तरीही तुम्ही सर्वांना हसवलंत, रडवलंत आणि एंटरटेन केलंत. (Bigg Boss Marathi 6 update)
रितेश पुढे असंही सांगतात की, “इतर तुम्हाला लहान समजत आहेत, पण या आठवड्याचे खरे एंटरटेनमेंटचे डॉन तुम्हीच आहात.” रितेश देशमुख यांच्या या वक्तव्यामुळे प्रभू शेळके भावुक झाल्याचंही पाहायला मिळत आहे. घरातील सदस्यांसमोर मिळालेल्या या कौतुकानंतर प्रभूचा आत्मविश्वास आणखी वाढलेला दिसत असून, प्रेक्षकांमध्येही त्याच्या खेळाबाबत सकारात्मक चर्चा सुरू झाली आहे. प्रभू शेळकेला मिळालेलं हे कौतुक त्याच्यासाठी नक्कीच मोठं ठरणार आहे. आता येत्या आठवड्यांमध्ये प्रभू हा ‘एंटरटेनमेंटचा डॉन’ हा टॅग कसा जपतो, याकडे प्रेक्षकांचं लक्ष लागलं आहे. (Bigg Boss Marathi 6 update)
