riteish deshmukh diwali : बॉलिवूड आणि मराठी सिनेसृष्टीतील लोकप्रिय आणि नेहमीच चर्चेत असणारं कुटुंब म्हणजे देशमुख कुटुंब. देशमुख कुटुंब सिनेविश्वासह राजकारणातही सक्रिय आहे. सोशल मीडियावर हे कुटुंब नेहमीच सक्रिय असलेलं पाहायला मिळालं आहे. सणवारात हे कुटुंब एकत्र असलेलं पाहायला मिळतं. देशमुख परिवार हा मूळचा लातूरचा आहे. त्यामुळे बरेचदा सण साजरे करण्यासाठी ते लातूरच्या त्यांच्या घरी एकत्र जमतात. दिवाळी असो, गणपती असो वा दसरा असो व्यस्त वेळातून वेळ काढत ते एकमेकांना वेळ देतात. मात्र यंदाच्या दिवाळीला रितेश देशमुख आणि जिनिलिया देशमुख त्यांच्या व्यस्त वेळापत्रकामुळे लातूरला गेले नाहीत.
गेल्या काही दिवसांपासून रितेश त्याचा ड्रीम प्रोजेक्ट असलेल्या ‘राजा शिवाजी’ सिनेमाच्या शूटिंगमध्ये व्यग्र आहे. दिवाळी लंचला सुद्धा तो उपस्थित नव्हता. यामुळे त्याच्या दोन्ही मुलांनी अभिनेत्यासाठी खास पत्र लिहिलं होतं आणि ‘राजा शिवाजी’ सिनेमाला प्रदर्शित झाल्यावर भरपूर यश मिळूदेत अशा शुभेच्छा त्यांच्या लाडक्या बाबाला दिल्या होत्या. रितेश देशमुख यानंतरही त्याच्या व्यस्त शेड्युलमधून वेळात वेळ काढत मुंबईच्या घरी पोहोचला आहे. आणि त्यानंतर रितेशने जिनिलिया आणि त्याच्या दोन्ही मुलांसह दिवाळी पाडवा साजरा केला. सर्वप्रथम त्याने रियान आणि राहिल यांना उटणं लावून अभ्यंगस्नान घातलं. यानंतर रितेशची दोन्ही मुलं रांगोळी काढत असल्याचं अभिनेत्याने शेअर केलेल्या व्हिडीओमध्ये पाहायला मिळतंय. त्यानंतर रितेश आणि त्यांच्या दोन्ही मुलांनी जिनिलियाच औक्षण केलं.
व्हिडीओच्या शेवटास चौघांनी मिळून दिवाळी पाडव्याच्या साऱ्यांना शुभेच्छा दिल्या आहेत. हा व्हिडीओ शेअर करत रितेशने भावुक कॅप्शन दिलं आहे. यंदाच्या दिवाळीला त्याला कुटुंबासह लातूरला जाता आलं नाही म्हणून त्याने नाराजी व्यक्त केली आहे. रितेशने कॅप्शन देत म्हटलं की, “दरवर्षी आम्ही दिवाळीचा सण आमच्या कुटुंबीयांबरोबर बाभळगाव लातूर येथे साजरा करतो”.
आणखी वाचा – बांदेकरांच्या लेकाच्या ‘त्या’ कमेंटने वेधलं लक्ष, सोहमने दिली पूजा बिरारीवरील प्रेमाची कबुली, चर्चेला उधाण
पुढे त्याने लिहिलं, “पण, यावर्षी ‘राजा शिवाजी’ सिनेमाचं शूटिंग सुरू असल्यामुळे आम्ही लातूरला जाऊ शकलो नाही. पण, आमच्या घरच्या परंपरा आम्हाला कायम लक्षात राहणार आहेत… यामुळेच आम्ही मुंबईत दिवाळी पाडवा साजरा केला. तुम्हा सर्वांना दीपावली पाडव्याच्या हार्दिक शुभेच्छा !!! खूप प्रेम, देशमुख परिवार”. रितेशच्या या व्हिडीओला लाईक्सचा वर्षाव पाहायला मिळत आहे.
