विविध चित्रपटांमधून वेगवेगळ्या भूमिकांमुळे अभिनेता रणदीप हुड्डा हा सतत चर्चेत असतो. सध्या तो ‘स्वातंत्र्य वीर सावरकर’ या चित्रपटामुळे अधिक चर्चेत आहे. या चित्रपटामध्ये त्याने स्वातंत्र्य वीर सावरकरांची भूमिका निभावली आहे. या चित्रपटाचा ट्रेलर प्रेक्षकांच्या भेटीला आला असून प्रेक्षकांनी या ट्रेलरला खूप पसंती दर्शवली आहे. ही भूमिका करण्यासाठी रनदीप खूप कष्ट करताना दिसत आहे. त्याने चित्रपटातील भूमिकेला न्याय मिळावा यासाठी शरीरयष्टीमध्ये बदल केल्याचेही दिसून येत आहे. (Randeep Hudda transformation)
रणदीपने सोशल मीडियावर त्याने एक फोटो शेअर केला आहे. हे फोटो पाहून त्याच्या चाहत्यांनी आश्चर्य व्यक्त केले आहे. यामध्ये त्याने आपले वजन कमालीचे कमी केले आहे. आपला फोटो शेअर करत कॅप्शनमध्ये ‘काला पानी’ असे लिहिले आहे. या फोटोवरुन सावरकरांनी काळ्या पाण्याची शिक्षा भोगल्यानंतर ते किती बारीक झाले असतील हे समजून येते. अशीच तब्येत रणदीपच्या फोटोमध्ये दिसून येत आहे. त्याच्या या ट्रान्सफॉर्मेशनचे खूप कौतुक होत आहे.
त्याच्या या फोटोवर अनेक नेटकऱ्यांनी प्रतिक्रिया दिल्या आहेत. एक नेटकरी लिहितो की, “याला म्हणतात खरा अभिनेता’, दुसरा नेटकरी लिहितो की, ‘सर आम्हाला तुमचा अभिमान आहे’, तिसरा नेटकरी म्हणतो की, ‘हे खरे टॅलेंट आहे. भूमिका साकारण्यासाठी काहीही करु शकतो’, अशा अनेक प्रतिक्रिया देत नेटकऱ्यांनी रणदीपचे कौतुक केले आहे.
‘स्वातंत्र्यवीर सावरकर’ हा चित्रपट विनायक दामोदर सावरकर यांची जीवनकथा आहे. ते एक स्वातंत्र्यसेनानी, समाजसुधारक व राजकीय नेते होते. त्यांची भूमिका रणदीप साकारणार आहे. या चित्रपटात त्याबरोबर अभिनेत्री अंकिता लोखंडेही दिसणार आहे. २२ मार्च २०२४ रोजी सर्व चित्रपटगृहांमध्ये हा चित्रपट प्रदर्शित होणार आहे.
या आधी रणदीप ‘हायवे’, ‘सुलतान’ व ‘सरबजीत’ या अनेक चित्रपटांमध्ये दिसून आला आहे. या चित्रपटातील भूमिकांचेही खूप कौतुक करण्यात आले होते. तसेच तो आगामी अनेक चित्रपटांमध्ये विविध भूमिका साकारताना दिसणार आहे.
