बॉलिवूड अभिनेता रणबीर कपूर व आलिया भट्ट नेहमीच कोणत्या ना कोणत्या कारणामुळे चर्चेत असतात. सध्या ते त्यांची लेक राहा कपूरमुळे चर्चेत आले आहेत. राहा झाल्यांनतर त्यांनी वर्षभर तरी तिचा चेहरा मीडियासमोर आणला नव्हता. मात्र तिला एक वर्ष होताच त्यांनी राहाची झलक दाखवली. तेव्हापासून राहा चर्चेत आली आहे. यानंतर आता कपूर कुटुंबाबाबत मोठी अपडेट समोर आली आहे. रणबीर व आलिया त्यांच्या ड्रीम हाउसमध्ये प्रवेश करण्यासाठी सज्ज झाले आहेत. (Ranbir Kapoor and Alia Bhatt New Home)
आलिया-रणबीर आणि राहा लवकरच मुंबईतील वांद्रे येथील कृष्णा राज बंगल्यात राहणार आहेत. या बंगल्याबाहेर रणबीर कपूर व आलिया अनेकदा स्पॉट झाले आहेत. बांधकामाची तपासणी करण्यासाठी हे जोडपे बरेचदा घरात गेले आहेत. गेल्या एक वर्षापासून या इमारतीचे बांधकाम सुरु आहे. या बंगल्याला राहा हिचे नाव देण्यात येणार आहे. सदर बंगला पूर्वी दिवंगत अभिनेते राज कपूर आणि त्यांची पत्नी कृष्णा राज यांच्या नावावर होता. कपूर कुटुंबाचा एकुलता एक नातू असल्याने ही मालमत्ता रणबीरच्या नावावर झाली. अशातच नुकताच रणबीर घरातील काम कसे सुरु आहे हे पाहण्यासाठी घराबाहेर स्पॉट झालेला दिसला. यावेळी त्याच्याबरोबर आलिया व त्याची आई नीतू कपूरही उपस्थित होत्या.
‘बॉलीवूड लाइफ’ने सूत्रांच्या हवाल्याने एका रिपोर्टमध्ये म्हटले आहे की, “आलिया व रणबीर दोघेही या घरात त्यांच्या कष्टाचे पैसे गुंतवत आहेत. जेणेकरून ते त्यांच्या स्वप्नातील घर त्यांच्या इच्छेनुसार बनवू शकतील. घराची एकूण किंमत २५० कोटी रुपये असेल. शाहरुख खानच्या ‘मन्नत’ आणि अमिताभ बच्चनच्या ‘जलसा’ प्रमाणे आता हे मुंबईतील सर्वात महागड्या घरांपैकी एक असेल”.
समोर आलेल्या मीडिया रिपोर्टनुसार, आपल्या मुलीवर अपार प्रेम करणारा रणबीर त्यांच्या बंगल्याचं नाव राहा ठेवू शकतो. चाहत्यांच्या सिद्धांतानुसार राहा बॉलिवूडची सर्वात मोठी स्टार किड बनेल. या आलिशान बंगल्याशिवाय रणबीर व आलिया यांच्याकडे वांद्रे येथे आणखी ४ फ्लॅट आहेत. ज्यांची एकूण किंमत 60 कोटी रुपयांपेक्षा जास्त आहे.