priya umesh new home : प्रत्येकालाच स्वतःच हक्काचं घर असावं असं वाटतं. यांत अनेक कलाकार मंडळीही आहेत ज्यांना स्वतःच हक्काचं घर व्हावं असं वाटतं. अनेक कलाकारांनी नवं घर घेतलंही आहे. काही कलाकारांनी तर यंदाचा गणेशोत्सव त्यांच्या नव्या घरात साजरा केला. अभिनेता विवेक सांगळे, उमेश कामत, प्रिया बापट या कलाकारांनी गणरायाचे नव्या घरात थाटामाटात स्वागत केले. काही महिन्यांपूर्वीच अभिनेत्री प्रिया बापट व अभिनेता उमेश कामतने नवं घर घेतलं. गुढीपाडव्याच्या शुभमुहूर्तावर त्यांनी ही आनंदाची बातमी चाहत्यांसह शेअर केली.
त्यानंतर प्रिया व उमेश यांनी यंदाचा गणेशोत्सव हा त्यांच्या नव्या घरात अगदी पारंपरिक अंदाजात साजरा केला. याची झलक प्रियाने तिच्या इंस्टाग्राम अकाउंटवर शेअर केला आहे. यावर्षीचा गणेशोत्सव का खास ठरला हे सांगताना प्रिया बापट लिहिते, “नव्या घरातील आमचा पहिला गणेशोत्सव, आमचे अनेक मित्रमंडळी, नातेवाईक घरी आले होते. महत्त्वाचं म्हणजे या सगळ्यांसाठी मी स्वतः जेवण बनवलं होतं. खूप गप्पा मारल्या, हसलो इतकी मजा केली की आता आवाज पण बसलाय”.
“सगळ्यांचा पाहुणचार करण्यात इतका वेळ गेला की आम्ही आमच्या गणु बाप्पाबरोबर फोटो देखील काढले नाहीत आणि आमच्या मित्रमंडळींबरोबर फोटो काढायला सुद्धा वेळ मिळाला नाही. पण, या सगळ्या आठवणी कायम आमच्याबरोबर राहतील. मी या आठवणी कायम जपून ठेवेन. आज बाप्पाला निरोप द्यायची वेळ आली आहे. किती सुंदर गेले हे ७ दिवस. मी खरंच शब्दांतही सांगू शकत नाही. फक्त कृतज्ञता व्यक्त करते”, असं प्रियाने या पोस्टमध्ये म्हटलं आहे.
आणखी वाचा – ‘तारक मेहता…’ फेम अभिनेत्रीचा घटस्फोट, १५ वर्षाचा संसार मोडला, बराच काळ long distance मध्ये राहिले अन्…
प्रियाच्या या पोस्टमध्ये तिचं नवं सुंदर असं घर पाहायला मिळत आहे. प्रशस्त हॉल, मॉड्युलर किचनची झलक यामध्ये पाहायला मिळाली आहे. समोर आलेल्या फोटोत प्रिया स्वतःच्या हाताने मोदक बनवताना दिसली, शिवाय बाप्पासाठी ती खास गोडाधोडाचंही बनवताना दिसली. प्रियाच्या पोस्टला अनेकांनी पसंती दर्शविलेली पाहायला मिळत आहे.
