स्टार प्रवाह वाहिनीवरील ‘प्रेमाची गोष्ट’ या मालिकेने अल्पावधीतच प्रेक्षकांच्या मनावर अधिराज्य केले आहे. मालिकेतील मुक्ता फेम तेजश्री प्रधान व सागर म्हणेजच अभिनेता राज हंचनाळे या कलाकारांच्या भूमिका प्रेक्षकांना खूपच आवडत आहे. त्याचबरोबर मालिकेचे कथानक प्रेक्षकांचे लक्ष वेधून घेत आहे. अशातच मालिकेत आता सध्या मुक्ता व सागर यांच्या लग्नाची धामधूम पाहायला मिळत आहे. मालिकेमध्ये आतापर्यंत साखरपुडा, मेहंदी, संगीत व हळद हे कार्यक्रम पार पडले असून आगामी भागांत मालिकेचे विवाह स्पेशल भाग प्रेक्षकांना पाहता येणार आहेत. (Preamchi Goshta Serial New Promo)
त्यापूर्वी मुक्ता व सागर एका खास सोहळ्यासाठी थेट अलिबागमध्ये पोहोचले आहेत. स्टार प्रवाह वाहिनीच्या अधिकृत इन्स्टाग्राम अकाऊंटवरून नुकताच एक व्हिडीओ शेअर करण्यात आला असून या व्हिडीओमध्ये ते अलिबागला जात असल्याचे पाहायला मिळत आहे. अलिबागमधल्या कोळीवाड्यात मुक्ता व सागरचं केळवण अगदी पारंपरिक पद्धतीने पार पडलं. सोशल मीडिया स्टार नलिनी मुंबईकर यांनी मुक्ता, सागर, इंद्रा आणि चिमुकल्या सईला सुग्रास जेवणाची मेजवानी दिली. ‘प्रेमाची गोष्ट’ मालिकेतल्या कलाकारांच्या स्वागतासाठी संपूर्ण कोळीवाडा सजला होता.
कोळी गाण्यांच्या ठेक्यावर कलाकारांचं स्वागत झालं आणि मग मुक्ता व सागर यांच्या केळवणाचा खास बेत रंगला. अलिबागकरांचं हे प्रेम पाहून मुक्ता व सागर हेदेखील भारावून गेले. सोशल मीडियावर विशेष लोकप्रिय असणाऱ्या नलिनी मुंबईकर या इन्फ्लूएन्सर काकूंनी त्यांचे केळवण केले. कोळी कुटुंबातील सागरचे केळवण असल्याने त्यांनी यावेळी खास माशांचा बेत केला, तर मुक्ता गोखलेसाठी शाकाहारी जेवणाची मेजवानी’होती. नलिनी यांनी नुकताच सोशल मीडियावर या केळवणाचा व्हिडिओ शेअर केला आहे.
केळवणाच्या या खास दिवशी मुक्ताने खास उखाणाही घेतला. ‘नलिनी काकुंनी आमंत्रण देऊन प्रेमाची गोष्ट केली मोठी. स्टार प्रवाहच्या साक्षीने भरली मुक्ताची खणा नारळाने ओटी, अलिबागकरांनी घातलाय सागर-मुक्ताच्या केळवणाचा घाट. पहाण्यासाठी सई सुद्धा पोहोचली धरुन इंद्रा आजीचा हात.’ असा हटके उखाणा घेत मुक्ताने अलिबागकरांचे मन जिंकले आहे. दरम्यान, या खास केळवणासाठी चाहतेदेखील चांगलेच उत्सुक आहेत.