मराठमोळा अभिनेता प्रथमेश परब व त्याची गर्लफ्रेंड क्षितिजा घोसाळकर लवकरच लग्नबंधनात अडकणार आहेत. अशातच प्रथमेशच्या हळदी समारंभाचे फोटोही समोर आले आहेत. प्रथमेश व क्षितिजा गेली अनेक वर्ष एकमेकांना डेट करत होते. त्यांच्या अफेअरला ३ वर्ष पूर्ण होताच त्यांनी साखरपुडा सोहळा उरकला. प्रथमेश व क्षितिजाच्या साखरपुड्याच्या फोटोंनीही सोशल मीडियावर अक्षरशः धुमाकूळ घातला होता. तसेच अभिनेत्याच्या होणाऱ्या बायकोच्या हळदी व मेहंदीचे अनेक फोटो समोर आले. (Prathamesh Parab Kshitija Ghosalkar)
प्रथमेशची होणारी बायको ही मूळची कोकणातली आहे. काही दिवसांपूर्वीच प्रथमेश त्याच्या सासरच्या घरीही पोहोचला होता. यावेळी त्याच्या सासरच्या लोकांनी जावयाचे भरभरुन लाड केलेलेही पाहायला मिळाले. प्रथमेश व क्षितिजाची लगीनघाई सुरु असून त्यांच्या लग्नापूर्वीच्या विधींना सुरुवात झाली असल्याचं समोर आलं आहे. अशातच प्रथमेशच्या होणाऱ्या बायकोने शेअर केलेल्या एका पोस्टने साऱ्यांचं लक्ष वेधून घेतलं आहे. क्षितिजाने तिच्या घराचा एक फोटो पोस्ट करत दिलेलं भावुक कॅप्शन साऱ्यांच लक्ष वेधून घेत आहे.
क्षितिजाने माहेरच्या आठवणी जपणारी एक पोस्ट शेअर करत असं म्हटलं आहे की, “आज सजलेल्या मंडपाने किती छान दिसतंय माझं घर. आजपर्यंत तुझी माझं घर अशी असलेली ओळख आता माझं माहेर अशी होणार. आणि आता अवघ्या काही तासांतच मी तुझा निरोप घेणार. तुझ्या प्रत्येक कोपऱ्याशी असलेल्या आठवणींना आज जणू खास एक चेहराच मिळाला आहे. बघ ना, काही मनसोक्त हसत आहेत. काही अलवार रडत आहेत. काहींमध्ये मला माझं बालपण दिसतं आहे. तर काहींमध्ये मी सासरी जाणार म्हणून होणारी घालमेल दिसत आहे”.
पुढे तिने असंही म्हटलं आहे की, “त्या सगळ्यांना मी माझ्या हृदयाच्या कुपीत कायम जपून ठेवणार आहे. सणावाराला येईन आवर्जून, तुझी भेट घ्यायला. तुही मग तयार रहा, आपलं नेहमीचं हितगुज करायला. तळटीप – सासरी रमेपर्यंत आणि रमल्यानंतरही तुझी आठवण मात्र कायम येईल”, असं म्हटलं आहे. या पोस्टवर प्रथमेशने केलेल्या कमेंटने साऱ्यांचं लक्ष वेधून घेतलं आहे. “किती छान. तुला इकडे एवढं प्रेम देऊ की तुला दोन्ही घर आपली वाटतील. आय लव्ह यु” अशी कमेंट प्रथमेशने केली आहे. या कमेंटवर क्षितिजाने कमेंट करत, “हो नक्की. आय लव्ह यु टू”, असं प्रतिउत्तर दिलं आहे.
