अभिनेता प्रथमेश परब व त्याची गर्लफ्रेंड क्षितिजा घोसाळकरने एकमेकांना बरीच वर्ष डेट केल्यानंतर अखेर ते दोघेही लग्नबंधनात अडकणार आहेत. येत्या २४ फेब्रुवारी रोजी ही जोडी लग्नबंधनात अडकणार आहे. दरम्यान दोघांच्या लग्नापूर्वीच्या विधींना सुरुवात झाली असल्याचं पाहायला मिळत आहे. काही दिवसांपूर्वीच प्रथमेश व क्षितिजाचा साखरपुडा सोहळा संपन्न झाला. व्हॅलेंटाईन डेचे औचित्य साधत दोघांनी त्यांचा साखरपुडा समारंभ उरकला. (Prathamesh Parab And Kshitija Ghosalkar Wedding)
अत्यंत पारंपरिक अंदाजात संपन्न झालेल्या या साखरपुड्याच्या फोटोंनी साऱ्यांचे लक्ष वेधून घेतले. दरम्यान प्रथमेश व क्षितिजाच्या साखरपुडा समारंभातील साधेपणाने प्रेक्षकांची मनंही जिंकली. यानंतर आता दोघांच्या लग्नविधींना सुरुवात झाली असून क्षितिजाने तिच्या इंस्टाग्राम अकाऊंटवरुन मेहंदी सोहळ्याचे काही खास फोटो शेअर केले आहेत. क्षितिजाच्या हातावर प्रथमेशच्या नावाची मेहंदी रंगली असल्याचं पाहायला मिळत आहे. “तुझ्या नावाची मेहंदी काढली रे”, असं कॅप्शन देत मेहंदी लावतानाचे व मेहंदी लावल्यानंतरचे काही खास फोटो क्षितिजाने तिच्या सोशल मीडियावरुन शेअर केले आहेत. हे फोटो तिने प्रथमेशला टॅगही केलेले पाहायला मिळत आहेत.
प्रथमेशच्या होणाऱ्या बायकोचा मेहंदी समारंभातील खास लूकने साऱ्यांचं लक्ष वेधून घेतलं. पारंपरिक टच असलेला हिरव्या रंगाचा वनपीस परिधान करत क्षितिजा या लूकमध्ये खूप खास दिसत होती. शिवाय यावेळी तिने परिधान केलेल्या दागिन्यांनीही साऱ्यांचं लक्ष वेधून घेतलं. क्षितिजने घातलेल्या कानातल्या दागिन्यांमध्ये प्रथमेशची पराजू असं लिहिलं होतं. ‘टाईमपास’ चित्रपटातील प्रथमेशची दगडू व केतकीची पराजू ही भूमिका विशेष गाजली. त्यामुळे प्रथमेशला दगडू या नावाने लोकप्रियता मिळाली.
क्षितिजाच्या या मेहंदी सोहळ्यातील लूकचे सर्वजण कौतुक करताना दिसत आहेत. तिच्या या फोटोवर लाईक्स व कमेंटदेखील होताना पाहायला मिळत आहेत. इतकंच नव्हेतर एकीकडे प्रथमेशला क्षितिजाच्या नावाची हळद लागली आहे. प्रथमेशच्या हळदी समारंभाचे फोटोदेखील समोर आले आहेत. अगदी थाटामाटात नाचत गाजत प्रथमेशच्या हळदी समारंभातील फोटो व व्हिडीओ सोशल मीडियावर अक्षरशः धुमाकूळ घालत आहेत. कलाकार मंडळी तसेच जवळचे मित्रमंडळी आणि कुटुंबीयांच्या समवेत प्रथमेशचा हा हळदी समारंभ पार पडलेला पाहायला मिळत आहे.