अभिनेत्री प्राजक्ता माळी तिच्या चित्रीकरणाच्या व्यस्त श्येड्युलमधून वेळात वेळ काढून ध्यानधारणा करताना नेहमीच पाहायला मिळते. प्राणायाम, योग, ध्यानधारणा, संगीत, सात्विक जीवन, सात्विक जेवण, पंचकर्म, निसर्ग या गोष्टींना ती अधिक प्राधान्य देते. कामाच्या व्यस्ततेनंतर विश्रांतीसाठी ती कधी बाहेरच्या वातावरणात मनसोक्तपणे फिरायला जाते. तर कधी एखाद्या आश्रमात जाऊन मौनव्रत धारण करते. सध्या ती करिअरच्या शिखरावर असताना प्राजक्ता ‘आर्ट ऑफ लिव्हिंगचा’ ऍडव्हान्स कोर्स करतेय. (Prajakta Mali On AOL)
श्री श्री रवीशंकर यांच्या त्रिवेणी आश्रमात ती हा कोर्स करत आहे. याबाबतच्या अनेक पोस्ट तिने याआधी सोशल मीडियावरून शेअर देखील केल्या आहेत. प्राजक्ता ही श्री श्री रविशंकर यांची शिष्य असून, ‘आर्ट ऑफ लिव्हिंग’च्या माध्यमातून ती योग क्रिया आणि मेडिटेशन करत असते. प्राजक्ताने सुरुवातीला ‘आर्ट ऑफ लिव्हिंग’चा कोर्स केला होता. त्यानंतर ती या कोर्सची ऍडव्हान्स ट्रेनिंग घेत होती. अशातच तिने ही ऍडव्हान्स ट्रेनिंग पूर्ण केल्याची खुशखबर चाहत्यांसह शेअर केली आहे.
याबाबतची एक पोस्ट नुकतीच तिने तिच्या इंस्टाग्राम अकाऊंटवरून शेअर केली आहे. आश्रमाबाहेरील फोटो तसेच आश्रमातील काही व्हिडीओ शेअर करत तिने ‘आर्ट ऑफ लिव्हिंग’चा ‘गुरुपूजा’ हा ऍडव्हान्स कोर्स पूर्ण केल्याचं सांगितलं. या पोस्टमध्ये कॅप्शन देत तिने लिहिलं आहे की, “आता मी स्वतःला “गुरुपूजा पंडित” म्हणू शकते का? काल बॅंगलोर आश्रमात ‘आर्ट ऑफ लिव्हिंग फाउंडेशन’चा “गुरुपूजा” कोर्स पूर्ण केला. २४ देश आणि संपूर्ण भारतातून ६३० जण यांत सहभागी होते. या कोर्सला किती महत्व आहे, हे ‘आर्ट ऑफ लिव्हिंग’चे कुटुंब समजू शकते. आणखी एक नाव जोडलं गेलं.”
प्राजक्ताच्या या पोस्टखाली हा कोर्स पूर्ण केल्याबद्दल अनेकांनी तिचं अभिनंदन केलं आहे. याआधी प्राजक्ताने ‘आर्ट ऑफ लिव्हिंग’च्या ऍडव्हान्स कोर्ससाठी त्रिवेणी आश्रमात गेल्याची पोस्ट शेअर केली होती. त्यावेळी तिने मौनव्रत धारण केल्याचा खुलासा केला होता.
