‘महाराष्ट्राची हास्यजत्रा’ या कार्यक्रमाने मागील बऱ्याच कालावधीपासून प्रेक्षकांचं मनोरंजन केलं आहे. भन्नाट विनोद निर्मिती, प्रत्येक कलाकाराची विशिष्ठ विनोदशैली प्रेक्षकांच्या मनात घर करण्यात कारणीभूत ठरली. ‘महाराष्ट्राची हास्यजत्रा’ हा कार्यक्रम आता केवळ महाराष्ट्रापुरताच मर्यादित न राहता जगभरात देखील लोकप्रिय ठरत आहे. या कार्यक्रमाचे महाराष्ट्रासह परदेशातही दौरे होत असतात. हास्यजत्रेची टीम सध्या ऑस्ट्रेलिया दौऱ्यावर आहे. परदेशात प्रेक्षकांचं मनोरंजन केल्यानंतर तिथेही सर्व कलाकार मंडळी धमाल करताना दिसतायत. प्राजक्ता माळी, समीर चौघुले, प्रसाद खांडेकर, नम्रता संभेराव, वनिता खरात यांच्यासह हास्यजत्रेचे दिग्दर्शक सचिन मोटेसुद्धा या ट्रेंडिंग गाण्यावर थिरकताना दिसत आहेत.(Maharashtrachi Hasyajatra Australia Tour)
अभिनेत्री प्राजक्ता माळीने हे रिल शेअर करत “When In Australia and bunch of mad people comes together.” असं कॅप्शन देखील लिहिलं आहे. पुढे प्राजक्ता म्हणते “सचिन मोटे सर सुद्धा सामील झाले, याचा विशेष वाला आनंद..”. प्राजक्ताने शेअर केलेल्या या रिलवर चाहत्यांनी भरभरून कमेंट्स करत कलाकारांचं कौतुक केलं आहे. या रिलवर चाहत्यांसह अन्य कलाकारांनी देखील कमेंट्स केलेल्या पाहायला मिळतायत. हास्यजत्राफेम श्याम राजपूत ने “वाह मोटे सर” अशी कमेंट करत सचिन मोटे यांच्या डान्सचं कौतुक केलं आहे.
या रिलनंतर प्राजक्ताने(prajakta mali) आणखी एक भन्नाट स्टोरी शेअर केली आहे. प्राजक्ताने शेअर केलेल्या स्टोरीमध्ये चेतना भट, नम्रता संभेराव, वनिता खरात आराम करताना दिसत असून प्राजक्ताने या व्हिडीओला “रिल्स करून दमलेल्या MHJ गर्ल्स” असं मजेशीर कॅप्शन दिलं आहे . हास्यजत्रेतील कलाकार मंचावर अनेक भन्नाट स्किट्स सादर करत प्रेक्षकांचं मनोरंजन करत असतातच पण त्याचबरोबर सोशल मीडियावर अनेक रिल्स शेअर करत देखील प्रेक्षकांच्या मनोरंजनात भर पाडत असतात. (Maharashtrachi Hasyajatra Australia Tour)
महाराष्ट्राच्या हास्यजत्रेतील समीर चौघुले, वनिता खरात, प्रसाद खांडेकर, नम्रता संभेराव, गौरव मोरे यांच्यासह अन्य कलाकारांच्या धमाल विनोद निर्मितीमुळे महाराष्ट्रभर हास्यजत्रेचा मोठा चाहतावर्ग निर्माण झाला आहे. दिग्दर्शक सचिन गोस्वामी व सचिन मोटे यांच्या दिग्दर्शनामुळे हास्यजत्रा आहे जगाच्या कानाकोपऱ्यात पोहचली आहे. सध्या हसयाजत्रेचा हा ऑस्ट्रेलिया दौरा चांगलाच गाजतोय. प्राजक्तासह अभिनेता प्रसाद खांडेकरने देखील या दौऱ्यातील अनेक फोटोज शेअर केले आहेत.
