Apurva Gore Wedding Rituals Begins : मराठी मनोरंजनसृष्टीत सध्या लग्नसराईचं वातावरण पाहायला मिळत आहे. अनेक लोकप्रिय कलाकार नव्या आयुष्याची सुरुवात करताना दिसत आहेत. अशातच आता छोट्या पडद्यावरून प्रेक्षकांच्या मनात घर केलेली अभिनेत्री अपूर्वा गोरे हिच्याही लग्नाची चर्चा रंगू लागली आहे. ‘आई कुठे काय करते’ या मालिकेमुळे अपूर्वा घराघरांत पोहोचली. काही दिवसांपूर्वीच तिने सोशल मीडियावर तिच्या प्रेमाची कबुली दिली होती. त्यानंतर आता ती अभिनेता अंशुमन जोशीसोबत लवकरच लग्नबंधनात अडकणार असल्याची माहिती समोर आली आहे.
अंशुमन जोशीने २०१२ साली प्रदर्शित झालेल्या गाजलेल्या ‘शाळा’ या चित्रपटातून बालकलाकार म्हणून प्रेक्षकांसमोर पदार्पण केलं होतं. अभिनयाबरोबरच तो दिग्दर्शक, लेखक, चित्रलेखक आणि छायाचित्रकार म्हणूनही आपली ओळख निर्माण करत आहे. त्यामुळे या दोघांच्या लग्नाची चर्चा सध्या सोशल मीडियावर रंगताना दिसत आहे. दरम्यान, लग्नापूर्वीचा पारंपरिक ग्रहमुख सोहळा नुकताच पार पडला. या खास सोहळ्याचे काही सुंदर फोटो अपूर्वाने तिच्या सोशल मीडिया अकाऊंटवर शेअर केले आहेत. या फोटोंसोबत तिने एक भावुक पोस्ट लिहिली असून त्या पोस्टमुळे चाहत्यांचं लक्ष वेधलं गेलं आहे. (Apurva Gore Wedding Rituals Begins)
अपूर्वा लिहिते, “ग्रहमुख विधीसाठी काय नेसावं हा पेच कधीच नव्हता. आईच्या लग्नातला ४० वर्षांपूर्वीचा शालू नेसायचाच, असं मी आधीच ठरवलं होतं. तो नेसल्यानंतर आईलाही खूप भरून आलं. ती खूप आनंदी होती आणि तिला माझं कौतुकही वाटत होतं, हे तिच्या डोळ्यांत स्पष्ट दिसत होतं. हे प्रेम, हा गोडवा आणि हे हळवे क्षण मी आयुष्यभर जपून ठेवणार आहे.” आईच्या आठवणींशी जोडलेला तो खास शालू नेसून अपूर्वाने तिच्या आयुष्यातील हा सुंदर क्षण अधिकच खास केला. त्यामुळे तिच्या ग्रहमुख सोहळ्याचे फोटो आणि ही भावुक पोस्ट सध्या सोशल मीडियावर चांगलीच चर्चेत आहे. (Apurva Gore Wedding Rituals Begins)
आणखी वाचा: प्रसिद्ध अभिनेत्रीची बिल्डरकडून मोठी फसवणूक, ४७ लाखांचा गंडा, नेमकं प्रकरण काय?
