झी मराठी वाहिनीवरील ‘का रे दुरावा’ या मालिकेतून घराघरांत लोकप्रिय झालेली अभिनेत्री म्हणजे सुरुची अडारकर. ‘का रे दुरावा’ मालिकेत सुरुचीने साकारलेली अदिती खानोलकर ही भूमिका चांगलीच गाजली होती. आजही सुरुचीच्या का रे दुरावा मालिकेची व त्या मालिकेमधील भूमिकेची क्रेझ काही कमी झालेली नाही. त्यानंतर तिने काही मालिकांत काम केले. अशातच ती मुकटीच झी मराठी वाहिनीवरीलच ‘सातव्या मुलीची सातवी मुलगी’ मालिकेच्यानिमित्ताने पुन्हा एकदा छोट्या पडद्यावर झळकली.
आपल्या अभिनयाने व निरागस सौंदर्याने चर्चेत राहणारी ही अभिनेत्री नुकतीच एका कारणामुळे चर्चेत आली ते म्हणजे तिचं लग्न. सुरुचीने अभिनेता पियुष रानडेबरोबर सप्तपदी घेत लग्नगाठ बांधली. दोघांनी ७ डिसेंबर रोजी लग्नगाठ बांधत सगळ्यांना आश्चर्याचा धक्का दिला. त्यांनी थेट विवाहाचे फोटो शेअर करत चाहत्यांना ही आनंदाची बातमी दिली. सुरुची अडारकरने बुधवारी (६ डिसेंबर) इन्स्टाग्रामवर एक पोस्ट शेअर केली. यात तिने अभिनेता पियुष रानडेबरोबर लग्नबंधनात अडकल्याचे जाहीर केले. यानंतर दोघेही त्यांच्या सुखी संसारात रमले आहेत.
अशातच आज सुरुचीचा वाढदिवस आहे आणि याचनिमित्ताने तिला पियुषने वाढदिवसाच्या शुभेच्छा दिल्या आहेत. पियुषने तिच्या वाढदिवसानिमित्त सोशल मीडियावर खास पोस्ट शेअर केली आहे. या पोस्टद्वारे त्याने असं म्हटलं आहे की, “तुझं प्रेम हा एक प्रकाश आहे, ज्याने मला माझ्या सर्वात गडद क्षणांमध्ये मार्गदर्शन केले आहे. तू माझ्यावर अशा प्रकारे प्रेम केले आहे जे कधीही शक्य होईल असं मला वाटलं नव्हतं. माझ्या सर्व चुका, कमतरता आणि अपूर्णता यांच्यावर प्रेम केल्याबद्दल धन्यवाद”.
यापुढे तिने असं म्हटलं आहे की, “आपले नाते ज्याप्रकारे बहरले आहे आणि ते सतत बहरत आहे, त्या प्रेमाबद्दल मी कृतज्ञ आहे. माझ्या आयुष्यातील सर्वात खास व्यक्तीला वाढदिवसाच्या हार्दिक शुभेच्छा. बर्थडे गर्ल माझं तुझ्यावर खूप प्रेम आहे.” दरम्यान, पियुषने शेअर केलेल्या या पोस्टमध्ये दोघांचे अनेक रोमॅंटिक फोटोस पाहायला मिळत आहेत. तसेच त्याने शेअर केलेल्या या पोस्टला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. तसेच सुरुचीला तिच्या वाढदिवसानिमित्त खास शुभेच्छादेखील दिल्या आहेत.
