सिनेसृष्टीत एकामागोमाग एक धक्का देणाऱ्या बातम्या समोर येत आहेत. नुकतीच ज्येष्ठ गायक व गझलकार पंकज उधास यांच्या निधनाने संपूर्ण संगीतक्षेत्र व चित्रपटसृष्टीवर शोककळा पसरली आहे. दीर्घ आजाराने त्यांनी वयाच्या ७२व्या वर्षी अखेरचा श्वास घेतला. या पाठोपाठ आता सिनेसृष्टीतून आणखी एक निधनाची बातमी समोर आली आहे. ‘पंचायत २’ या वेबसीरिजमध्ये काम करणारी अभिनेत्री आंचल तिवारी हिचा मृत्यू झाला आहे. रस्ता अपघातात अभिनेत्रीचा मृत्यू झाला असल्याचं समोर आलं आहे. (anchal tiwari died)
आंचल भोजुपरी इंडस्ट्रीतही खूप सक्रिय होती. या अपघातात आणखी एका भोजपुरी अभिनेत्री सिमरन श्रीवास्तव व गायक छोटू पांडे यांचाही मृत्यू झाला. भोजपुरी चित्रपटसृष्टीतील चार कलाकारांचाही रस्ता अपघातात मृत्यू झाला आहे. बिहार येथील कैमूरमधील देवकाली गावाजवळ जीटी रोड येथे रविवारी संध्याकाळी हा अपघात झाला. त्यांनतर सोमवारी सकाळी मृतांची ओळख पटली. यानंतर पोलिसांनी एक निवेदन जारी करत मृत्यूला दुजोरा दिला आहे.
आंचल तिवारीने ‘पंचायत २’ मधील मुख्य अभिनेत्री रिंकीची मैत्रीण रवीनाची भूमिका साकारली होती. मोहनिया पोलीस स्टेशन हद्दीतील देवकाली गावाजवळ जीटी रोडवर रविवारी संध्याकाळी ही घटना घडली. मोहनियाचे डीएसपी दिलीप कुमार यांनी सांगितले की, सोमवारी मृतांची ओळख पटली असून भोजपुरी गायक विमलेश पांडे उर्फ छोटू पांडे यांच्याही मृत्यूचा यांत समावेश आहे.
यावेळी अपघातात एकूण ९ जणांचा मृत्यू झाला आहे. सर्व कलाकार कारने प्रवास करत होते. पोलिसांनी दिलेल्या माहितीनुसार, मृतांमध्ये आंचल तिवारी, सिमरन श्रीवास्तव, प्रकाश राम, दधिबल सिंग, अनु पांडे, शशी पांडे, सत्य प्रकाश मिश्रा व बागिश पांडे यांचा मृत्यू झाल्याचं सांगितलं. प्रत्यक्षदर्शींनी दिलेल्या माहितीनुसार, प्रथम त्यांच्या कार व मोटरसायकलची टक्कर झाली, त्यामुळे दुचाकी कारच्या बाजूच्या दुसऱ्या लेनमध्ये गेली. त्यावेळी समोरुन भरधाव वेगाने येणाऱ्या ट्रकने कारला धडक दिली. या अपघातात मोटारसायकल चालकासह ९ जणांचा जागीच मृत्यू झाला. अपघातानंतर ट्रकचालकाने घटनास्थळावरून पळ काढला.
