सध्या सोशल मीडियावर ट्रेंडिंग गाण्यांनी धुमाकूळ घातला आहे. अशातच सध्या या ट्रेंडिंग गाण्यांच्या यादीत ‘गुलाबी साडी’ या गाण्याची क्रेज असलेली पाहायला मिळते. इन्स्टाग्राम रीलवर तर गुलाबी साडीने अक्षरशः हैदोस घातला आहे. केवळ महाराष्ट्रातच नव्हेतर संपूर्ण जगभरात या गाण्याने भुरळ घातली आहे. बॉलिवूडमध्येही या गाण्याने साऱ्यांची मन जिंकली. अगदी माधुरी दीक्षित, नेहा कक्करलाही या गाण्याने थिरकायला भाग पाडलं. तर आफ्रिकेच्या किली पॉललाही या गाण्याने ठेका धरायला लावला. (Gulabi Sadi Song Viral)
सध्या सर्वत्र आयपीएलची क्रेज सुरु असलेली पाहायला मिळत आहे. या आयपीएलमध्येही गुलाबी साडी गाणं वाजलं आणि क्रिकेटप्रेमींनी या गाण्यावर ठेका धरला. अशातच आता या गाण्याच्या एका व्हिडीओने साऱ्यांच्या नजरा वळविल्या आहेत. सध्या सोशल मीडियावर व्हायरल होणारा व्हिडीओ पाहून ‘गुलाबी साडी’ गाण्याची केवढी क्रेझ वाढली आहे याचा अंदाज येतो.
गुलाबी साडीवर होणारा हा व्हिडीओ पाकिस्तानातील असल्याचा दावा संबंधित नेटकऱ्याने केला आहे. अमर प्रकाश या पाकिस्तानमध्ये राहणाऱ्या एका तरुणाने त्याच्या इन्टाग्राम अकाउंटवरुन ‘गुलाबी साडी’ गाण्यावर डान्स करतानाचा व्हिडीओ शेअर केला आहे. “जेव्हा तुम्ही पाकिस्तानमधील मराठमोळ्या लग्नसमारंभात ‘गुलाबी साडी’ या गाण्यावर डान्स करता…”, असं कॅप्शन देत हा व्हिडीओ शेअर केला आहे.या व्हिडीओवर संजू राठोडनेही कमेंट केलेली पाहायला मिळत आहे. “खूपच छान”, अशी कमेंट संजूने केली आहे.
पाकिस्तानमधील या व्हायरल व्हिडीओवर सध्या नेटकरी कौतुकाचा वर्षाव करत आहे. तर या गाण्यामुळे संजू राठोड चर्चेत आला आहे. सोशल मीडियावर वाजणाऱ्या या गाण्याची क्रेज पाहता सगळीकडून संजूच कौतुक केलं जात आहे. फेब्रुवारी महिन्यात हे गाणं प्रदर्शित केलं. या गाण्याला आता कोटींच्या घरात व्ह्यूज मिळाले असून हे गाणं इन्स्टाग्रामवर ट्रेडिंग गाण्यांच्या यादीमध्ये आहे. याआधीही संजूच्या ‘नऊवारी साडी’ या गाण्याने साऱ्यांची मन जिंकली होती.