‘झी मराठी’ वाहिनीवरील ‘पारू’ या मालिकेवर प्रेक्षक भरभरुन प्रेम करताना दिसत आहेत. अल्पावधीतच या मालिकेला प्रेक्षकांनी खूप प्रेम दिलेलं पाहायला मिळतं. मालिकेच्या कथानकाने प्रेक्षकांना अक्षरशः खुर्चीत खिळवून ठेवलं आहे. तसेच मालिकेत येणाऱ्या रंजक वळणांमुळे ही मालिका अधिकच लोकप्रिय झाली. या मालिकेतून अभिनेत्री शरयू सोनावणे ही पारूच्या भूमिकेतून समोर आली आहे. मालिकेतील शरयूच्या भूमिकेला म्हणजेच पारूला विशेष पसंती मिळत आहे. शरयूने आजवर तिच्या अभिनयाने प्रेक्षकांच्या मनात घर केलं आहे. (Sharayu Sonavane Mehandi Ceremony)
पारू या मालिकेशिवाय शरयू तिच्या वैयक्तिक कारणामुळे चर्चेत आली आहे. काही दिवसांपूर्वीच शरयूने तिच्या लग्नाचे फोटो शेअर करत चाहत्यांना खूप मोठा धक्का बसला. शरयूने तिच्या लग्नाच्या पहिल्या वाढदिवसानिमित्त तिच्या लग्नातील काही खास क्षण चाहत्यांसह शेअर केले. वर्षभरापूर्वीच शरयूने निर्माता जयंत लाडेसह लग्नगाठ बांधली. वर्षभर दोघांनी त्यांच्या या लग्नाबाबत गुपित ठेवलं होतं. लग्नाला वर्ष होताच त्यांनी लग्नाची जाहीर बातमी चाहत्यांसह शेअर केली.
सोशल मीडियावरुन शेअर केलेल्या या फोटोंमध्ये त्यांच्या लग्नाचे अनेक फोटो चर्चेत राहिले. यानंतर आता शरयूने तिच्या मेहंदी सोहळ्यातील काही खास फोटो शेअर केले आहेत. मेहंदी समारंभासाठी शरयूने पांढऱ्या व निळ्या रंगाची वेस्टर्न टच असलेली अशी लेहेंगा चोळी परिधान केली होती. तसेच तिच्या हातावर सुबक व कोरीव अशी नक्षीकाम करत काढलेली मेहंदी अधिक लक्षवेधी ठरत आहे. भरीव अशी मेहंदी न काढता शरयूने तिच्या हातावर नाजूक आणि मोजक्याच नक्षीत मेहंदी काढली होती. मेहंदीच्या लूकमध्ये ती खूपच सुंदर दिसत होती.
शरयूच्या लग्नातील तिच्या लूकची बरीच चर्चा रंगलेली पाहायला मिळाली. यावेळी शरयूने लग्नासाठी खास लाल रंगाची सुंदर नक्षीकाम असलेल्या काठाची भरजरी पैठणी नेसली होती आणि त्यावर हिरव्या रंगाचा नक्षीकाम असलेला शेलाही घेतला होता. तिचा हा मराठमोळा लूक चर्चेत आला. तर रिसेप्शनसाठी शरयूने पांढऱ्या रंगाची डिझाइनर साडी नेसली होती. आणि त्यावरील आकर्षक असे डायमंडचे दागिने लक्षवेधी ठरले.