मराठी मनोरंजन विश्वात नाटक हे मनोरंजनाचं एक उत्तम माध्यम मानलं जातं. जेव्हा जेव्हा नाटकांचा विषय निघतो तेव्हा एक नाव हमखास घेतलं जातं ते म्हणजे लेखक, दिग्दर्शक विजय तेंडुलकर. विजय यांच्या नाटकांवर आधारित पुढे अनेक चित्रपट केले गेले. विजय यांच्या नाटकावर आणखी एक चित्रपट प्रेक्षकांच्या भेटीला येत आहे. भारतरत्न डॉक्टर बाबासाहेब आंबेडकर यांच्या विचारसरणीवर आधारित विजय यांचं ” पाहिजे जातीचे हे नाटक चांगलंच गाजलं होतं. याच नाटकावर आता ” पाहिजे जातीची” हा चित्रपट प्रेक्षकांच्या भेटीला येणार आहे.(pahije jatiche)
कबड्डी नरेंद्र बाबू दिग्दर्शित आणि डॉ. मल्लिकार्जुन एन. गजरे यांची निर्मिती असलेला ‘पाहिजे जातीचे’ हा चित्रपट सामाजिक, सांस्कृतिक विषयांवर भाष्य करणारा आणि प्रश्न विचारणारा चित्रपट आहे, असे ट्रेलरवरून दिसून येते. यात विक्रम गजरे, ज्येष्ठ अभिनेते सयाजी शिंदे, संजना काळे हे कलाकार मुख्य भूमिकेत असून पुन्हा एकदा सयाजी शिंदे आपला हटके अभिनय सादर करण्यासाठी तयार आहेत. एका लहान गावातील महिपती या महत्त्वाकांक्षी तरूणाची कथा असून, केवळ जातीमुळे समाज त्याचे पाय खेचू पाहतो, मात्र त्यातूनही तो यशस्वी भरारी कशी घेतो यावर आधारलेला हा चित्रपट आहे.
नुकताच या चित्रपटाचा ट्रेलर प्रदर्शित करण्यात आला. ट्रेलर लॉन्चच्या कार्यक्रमास कलाकार सयाजी शिंदे, विक्रम गजरे, संजना काळे, दिलीप अहिरे, निर्माते डॉ. मल्लिकार्जुन एन. गजरे, लेखक-दिग्दर्शक कबड्डी नरेंद्र बाबू, संवाद लेखिका उमा कुलकर्णी, संगीत दिग्दर्शक अन्वेषा हे उपस्थित होते.(pahije jatiche trailer)
आजच्या काळातही जातीच्या एका लेबलमुळे होतकरू मुलांचे आयुष्य धुळीस मिळण्याचे मोठे प्रमाण दिसून येते. त्यामुळे जातीपातीत न अडकता केवळ हुशारी आणि गुणांच्या जोरावर प्रगती केली पाहिजे ही शिकवण देणारा हा चित्रपट लवकरच चित्रपटगृहात आपल्या भेटीस येत आहे.
