बॉलिवूड अभिनेत्री नीना गुप्ता अनेकदा त्यांच्या विधानांमुळे सतत चर्चेत असतात. नीना यांनी बॉलिवूडमध्ये अनेक दर्जेदार चित्रपटांमध्ये कमालीच्या भूमिका केल्या. सध्या त्या दिल्लीमध्ये असून त्यांची प्रकृती बिघडली असल्याचे वृत्त होते. नीना तपासणी करण्यासाठी रुग्णालयामध्ये पोहोचल्या. यादरम्याने रुग्णालयामध्ये अशी काही घटना घडली ज्यामुळे त्यांचा संताप झाला. त्यांनी स्वतः रुग्णालयामधील संपूर्ण घटना उघडकीस आणली. त्यांच्याबरोबर नक्की काय झाले हे जाणून घेऊया. (Neena gupta angry story )
‘आज तक’च्या वृत्तानुसार, नीना या तपासणी करण्यासाठी गुरुग्राममधील एका रुग्णालयामध्ये पोहोचल्या होत्या. यादरम्याने तपासणीआधीच त्यांना भलामोठा फॉर्म भरण्यासाठी दिला. तब्येत खराब असतानाही इतकी मोठी प्रक्रिया करायला लावली त्यामुळे त्या संतापल्या. पण फॉर्ममध्ये इतर माहितीबरोबरच धर्म विचारल्याने त्यांना अधिक राग आला. रुग्णालयाच्या या प्रकाराबद्दल नीना यांनी सोशल मीडियावर आपला राग व्यक्त केला आहे. घडल्या प्रकाराबाबत नीना यांनी इन्स्टाग्राम स्टोरीवर व्हिडीओ शेअर केला आहे. या व्हिडीओमध्ये त्या म्हणाल्या की, “मी एका नामांकित रुग्णालयामध्ये आले आहे. नोंदणीचा फॉर्म भरत आहे. हा फॉर्म भरता भरता मी अजूनच आजारी पडेन. तशी मी इतकीही आजारी नाही. पण मी हा फॉर्म भरत आहे. आता इथे एक कॉलम आहे ज्यामध्ये माझा धर्म विचारला आहे”.
नोंदणी फॉर्म भरताना नीना यांनी धर्माचा कॉलम पाहिला आणि त्या अधिक संतापल्या. त्यावर त्या म्हणाल्या की, “अरे हे तर अजून होत आहे. देवा! आता आमचं काय होईल”. नीना यांनी रुग्णालयामध्ये जातानाचा अजून एक व्हिडीओ शेअर केला होता ज्यामध्ये त्या १० मिनिटे ट्रॅफिकमध्ये अडकल्या होत्या.
नीना या नुकत्याच ‘मस्त मे रहने का’ या चित्रपटामध्ये जॅकी श्रॉफ यांच्यासह दिसून आल्या होत्या. हा चित्रपट प्रेक्षकांच्या पसंतीस उतरला होता. आता नीना ‘पंचायत ३’ या वेबसीरिजमध्ये दिसणार आहेत. ‘पंचायत’ वेबसीरिजच्या पहिल्या दोन भागांमधील यांच्या भूमिकेचे प्रचंड कौतुक केले होते.