‘मोकळा श्वास’, ‘कट्यार काळजात घुसली’, ‘नटसम्राट’ यांसारख्या अनेक चित्रपटातून लोकप्रिय झालेली अभिनेत्री म्हणजे मृन्मयी देशपांडे. मराठी नाटक, मालिका व चित्रपट यातून आपल्या दमदार अभिनयाने प्रेक्षकांच्या मनात आपली एक जागा निर्माण केली आहे. मृण्मयी सोशल मीडियावर चांगलीच सक्रिय असते. सोशल मीडियावर ती तिचे अनेक फोटो, बहिणीबरोरचे मजेशीर व्हिडीओ तसेच तिच्या पतीबरोबरचे काही खास फोटोदेखील शेअर करत असते. अशातच तिने नुकत्याच शेअर केलेल्या एका व्हिडीओने सर्वांचे लक्ष वेधून घेतले आहे.
मृण्मयीने तिच्या इन्स्टाग्राम अकाऊंटद्वारे त्यांच्या महाबळेश्वरमधील शेतातील घराचा एक खास व्हिडीओ शेअर केला आहे. गेल्या काही वर्षांपासून मृण्मयी अभिनयाव्यतिरिक्त शेती करण्यात चांगलीच रमली असल्याचे पाहायला मिळत आहे. अभिनयातून मोकळा वेळ मिळाला की, ती तिच्या पतीबरोबर महाबळेश्वर येथे शेती करत असते. ती अनेकदा शेतातले फोटो व व्हिडीओही चाहत्यांसह शेअर करत असते. त्यानंतर आता तिने शेतीपूरक व्यवसायही सुरू केला आहे.
अशातच मृण्मयीने तिच्या इन्स्टाग्राम अकाऊंटद्वारे एक व्हिडीओ शेअर केला आहे. ज्यामध्ये त्यांनी शेतात त्यांचं स्वत: छोटस टुमदार घर बांधलेलं पाहायला मिळत आहे. या व्हिडीओद्वारे मृण्मयीने त्यांच्या या घराची छोटीशी झलक चाहत्यांबरोबर शेअर केली आहे. या व्हिडीओमध्ये मृण्मयीचा पती त्यांच्या या नवीन घराची माहिती देताना दिसत आहे. यात तो माती व शेणाने बांधलेलं घर दाखवत आहे. त्याचबरोबर या घराला अजून दारे-खिडकी लावले नसल्याचेदेखील सांगतो. यानंतर तो त्यांच्या घराची चूल ही पटवतो.
“शेतावर काहीतरी नवं, हातानी बांधलेलं, प्रेमानी बांधलेलं” असं म्हणत मृण्मयीने हा व्हिडीओ शेअर केला आहे. तसेच मृण्मयी-स्वप्नील यांनी त्यांचा यंदाचा गुढीपाडवा त्यांच्या शेतातल्या या मातीने व शेणाने बांधलेल्या घरात साजरा केल्याचेदेखील या व्हिडीओमध्ये पाहायला मिळत आहे. या व्हिडीओमध्ये हे दोघेही घराबाहेर मोठी गुढी उभारतानाचे दृश्य पाहायला मिळत आहे. दरम्यान, या व्हिडीओखाली अनेकांनी त्यांच्या या नवीन घराचे कौतुक केले आहे. “खूप सुंदर, खूपच छान, कमाल, खूप सुंदर आणि मातीची घर खूप छान असतात.” अशा अनेक कमेंट्सद्वारे अनेकांनी हे घर आवडल्याचे म्हटले आहे.