‘शाळा’ हा प्रत्येकाच्याच आयुष्यातला एक अविभाज्य घटक. त्यातही गावाकडची शाळा म्हटलं तर या शाळेत शालेय शिक्षणासह आयुष्याची शिकवण देणारे अनेक धडे अन् कविता शिकायला मिळतात. शाळेचा अभ्यास म्हटला तर कुणी या अभ्यासात खूप हुशार, कुणी कमी अभ्यास करणारा किंवा कुणी अजिबातच अभ्यास न करणारा म्हणजेच रुढार्थाने ‘ढ’ विधार्थी असे अनेक विद्यार्थी आले. त्यातही शाळेतल्या ‘त्या’ वयात आपल्या प्रत्येकालाच कोणी ना कोणी आवडत असतोच. अजाण वयातल्या त्या भावना प्रत्येकासाठीच कायमच विशेष असतात. शाळेतल्या या ‘हुशार’ आणि ‘ढ’ विद्यार्थ्यांचा व त्यांच्यातील प्रेम, मैत्री या भावभावनांचं विश्व उलगडून दाखवण्यासाठी ‘मीडिया वन सोल्युशन्स’ प्रस्तुत आणि ‘कोरी पाटी’ प्रॉडक्शन व ‘इट्स मज्जा’ ओरिजिनल ‘आठवी अ’ ही एक नवी कोरी सीरिज घेऊन प्रेक्षकांच्या भेटीला येत आहे. (Athvi a webseries)
शाळेतल्या आठवणींना उजाळा देतानाच, या वयातील प्रत्येकाचे अनुभव, त्या वयातील यारी, तसेच त्या अजाण वयातील नितळ प्रेमभावना यावर भाष्य करणारी ही प्रेमळ वेबसीरिज लवकरच युट्युबच्या माध्यमातून चाहत्यांच्या भेटीला येणार आहे. नुकतंच या सीरिजचे पोस्टर सोशल मीडियावर शेअर करण्यात आले असून या पोस्टरला चाहत्यांनी चांगलाच प्रतिसाद दिला असल्याचे पाहायला मिळत आहे.
‘आठवी अ’ या सीरिजची कथा, संवाद व दिग्दर्शन नितीन पवार यांनी केले आहे. तर पटकथा नितीन वाडेवाले व नितीन पवार यांनी लिहिली आहे. सीरिजचे सह दिग्दर्शक नितीन वाडेवाले हे आहेत. तर संगीत मंदार पाटील यांनी केले आहे. सीरिजचे छायांकन यश भागरे, स्वप्नील पोळ व अमित चव्हाण यांनी केले आहे आणि कला दिग्दर्शन सोनाली घाडगे यांनी केले आहे. तर निर्मिती प्रमुख विनीत पवार व ध्वनी राजेश्वरी पवार यांनी केले आहे. त्याचबरोबर सह संकलनाची जबाबदारी जय लोरे यांनी पार पाडली आहे.
मीडिया वन सोल्युशन्स आणि शौरिन दत्ता निर्मित ‘आठवी अ’ या सीरिजचे प्रोजेक्ट प्रमुख अनंत श्रीवास्तवा व जैमिन शिगवण हे आहेत. तर क्रिएटिव्ह हेड अंकिता लोखंडे असून फायनान्सचा पदभार विशाल मेनारिया यांनी स्वीकारला आहे. दरम्यान, ‘मीडिया वन सोल्युशन्स’ प्रस्तुत, मीडिया वन सोल्युशन्स आणि शौरिन दत्ता निर्मित ‘आठवी अ’ ही नवी कोरी वेबसीरिज ४ मार्चपासून चाहत्यांच्या भेटीला येणार आहे. ही सीरिज प्रेक्षकांना इट्स मज्जा या युट्यूब चॅनेलवर पाहायला मिळणार आहे.
