स्टार प्रवाह वाहिनीवरील ‘प्रेमाची गोष्ट’ मालिका सध्या टीआरपीच्या शर्यतीत पुढे आहे. या मालिकेतील मुक्ता या पात्राला तर प्रेक्षकांनी डोक्यावर उचलून धरलं. अभिनेत्री स्वरदा ठिगळे मुक्ता पात्र साकारत आहे. तिला प्रेक्षकांचं भरभरुन प्रेम मिळत आहे. यशाच्या शिखरावर असताना स्वरदाबरोबर एक विचित्र अपघात घडला. याबाबतच तिने व्हिडीओ शेअर करत माहिती दिली आहे. तब्बल सलग २४ तास शूट करुन घरी परतताना स्वरदाच्या कारचा अपघात झाला. यामध्ये तिच्या गाडीचं खूप नुकसान झालं. सुदैवाने ती वाचली. जीवावर बेतणाऱ्या अपघातातून स्वरदा थोडक्यात बचावली. याच घटनेने तिला मोठा धक्का बसला आहे. तिने या अपघाताबाबत संपूर्ण माहिती दिली आहे. (Premachi Goshta fame Swarda Thigales car accident)
व्हिडीओद्वारे स्वरदाने तिच्या गाडीची हालत दाखवली. तसेच बरंच नुकसान झाल्याचंही दिसून आलं. स्वरदा म्हणाली, “आता पहाटेचे सहा वाजले आहेत. पहाटे ५.३० वाजता हा किस्सा माझ्याबरोबर झाला आहे. गाडीची हेडलाइट गेली आहे, चाक गेलं आहे, गाडीचं दार आतमध्ये घुसलं आहे. आता तर माझ्या गाडीचा दरवाजा उघडतही नाही. दुसऱ्या बाजूच्या दरवाजाने मी गाडीमधून खाली उतरले”.
“पूर्णपणे माझ्या गाडीचं नुकसान झालं आहे. काल म्हणजे सात ते दहा वाजेपर्यंत आमची शिफ्ट होती. स्टार प्रवाह वाहिनीवरील प्रेमाची गोष्ट ही मालिका मी करते. याबाबत तुम्हा सगळ्यांना माहितच असेल. काल सकाळी सातच्या शिफ्टला माझं काम सुरु झालं. ते आज पहाटे पाच वाजता माझं पॅकअप झालं आहे. मी एकटी ही गाडी चालवत घरी आले. चांदीवली स्टुडिओ ते मड अशी मी ही गाडी चालवली. मला झोप लागली. पेंगत होते. कारण मी प्रचंड थकली आहे. कारण आदल्या दिवशी सकाळी सात ते दुसऱ्या दिवशी पाच वाजेपर्यंत शूटच करत होते. त्यामुळे माझं हे खूप मोठं नुकसान झालेलं आहे”.
आणखी वाचा – ‘हिरामंडी’ फेम अभिनेत्री झाली आई, गोंडस मुलाला दिला जन्म, कुटुंबात जंगी सेलिब्रेशन
“खूप महागात पडलेलं आहे. महासंगम आणि आमचं शूटच मला महागात पडलं. आता हा कितीचा फटका बसणार आहे? याबाबत मला कल्पना नाही. ही गोष्ट माझ्या जीवावर बेतली नाही यासाठी मी स्वतःला नशिबवान समजते. झोप लागून गाडी कुठे धडकली नाही आणि माझ्या जीवावर काही आलं नाही हेच मला आता थोडं बरं वाटतंय. मला माझ्या सहकलाकारांनाही ही विनंती आहे की, तुम्ही असं काही करु नका. कारण मला आता या प्रसंगावरुन कळालं आहे की, भविष्यात मला काय करायचं नाही. पण यामधून तुम्ही तरी काहीतरी शिका. तुमच्या जीवाशी तुम्ही खेळू नका. काम होत राहिल. पण तुमचा जीव महत्त्वाचा आहे. हे एवढंच मला तुम्हाला सांगायचं आहे”. स्वरदाला काही दुखापत झाली नाही हे एवढंच काय ते तिचं नशिब.
