Heeramandi Actress Sharmin Segal : ‘हिरामंडी’ अभिनेत्री शर्मिन सेहगलने नुकतीच तिच्या चाहत्यांसह आनंदाची बातमी दिली आहे. अभिनेत्री आई झाली असल्याची गोड बातमी समोर आली आहे. पत्रकार विक्की ललवानी यांनी सांगितले आहे की संजय लीला भन्साळीच्या भाचीने म्हणजेच शर्मिन सेहगलने २८ मे २०२५ रोजी एका मुलाला जन्म दिला. तिने पती अमन मेहता यांच्याबरोबर त्यांच्या पहिल्या मुलाचे स्वागत केले आहे. तथापि, या जोडप्याने या आनंदाच्या बातमीबाबत सोशल मीडियावर काहीही सांगितलेले नाही. शिवाय कोणतीही अधिकृत घोषणाही केलेली नाही. परंतु या वृत्तानुसार, शर्मिन व अमन यांच्या घरी चिमुकल्या बाळाचे आगमन झाले आहे.
शर्मिन सेहगलने अमन मेहता यांच्याशी लग्न केले. अमन हे टोरेंट ग्रुपची सहायक कंपनी टोरेंट फार्मास्यूटिकल्स मध्ये एग्जीक्यूटिव डायरेक्टर या पदावर कार्यरत आहेत. या जोडप्याने नोव्हेंबर २०२४ मध्ये इटलीमध्ये लग्न केले. या लग्नात कुटुंबातील जवळच्या लोकांचा समावेश होता. यानंतर, अभिनेत्री गुजरातमधील अहमदाबादला गेली आणि नंतर मुंबईला परतली आणि सध्या हे जोडपे मुंबईत राहत आहेत. शर्मिन आणि अमन याचबरोबर संजय लीला भन्साळी आणि तिचे आई-वडील दीपक आणि बेला भन्साली सेहगल यांच्यासह भन्साली कुटुंब मुलाच्या आगमनाने खूष आहे.
आणखी वाचा – प्रिन्स नरुला व युविका चौधरीच्या घरी चोरी, मौल्यवान वस्तू लंपास, घरकाम करणाऱ्या महिलेचाच डाव
शर्मिन सेहगल यांनी संजय लीला भन्साळीच्या नेटफ्लिक्सवरील ‘हिरामंडी’ या वेबसीरिजमध्ये काम केले. त्यात त्यांच्या अभिनयाची खूप खिल्ली उडविली गेली. या वेबसीरिजनंतर अभिनेत्रीला बराच ट्रोलिंगचा सामना करावा लागला. तिच्या व्यक्तिरेखेचे नाव अलमजेब असे होते, तर या पात्राच्या आईची भूमिका मनीषा कोइराला हिने सांभाळली. ‘मलाल’ या चित्रपटातून तिने २०१९ पासून तिच्या अभिनय कारकिर्दीची सुरुवात केली. या चित्रपटाची निर्मितीही संजय लीला भन्साली यांनी केली होती.
शर्मिन सेहगलचा चित्रपट
अभिनेत्री होण्यापूर्वी शर्मिन सेहगल हिने दीपिका पादुकोण आणि रणवीर सिंग स्टारर ‘बाजीराव मस्तानी’ मध्ये सहाय्यक दिग्दर्शक म्हणून काम केले आहे. कॅमेरामागील कामकाजाच्या शैलीचा अनुभवही तिला आहे. ती ‘अतिथि भूतो भव’ या भयपट-कॉमेडीमध्येही दिसली. जिथे तिने जॅकी श्रॉफ आणि प्रतीक गांधी यांच्याबरोबर स्क्रीन शेअर केली.
