मराठी मनोरंजन विश्वात सध्या लगीनघाई सुरु आहे. मराठीतील अनेक कलाकार मंडळी आपल्या जोडीदारांबरोबर विवाहबंधनात अडकत आहेत. नुकतेच शिवानी सुर्वे व अजिंक्य ननावारे हे दोघे विवाहबंधनात अडकले. त्याचबरोबर अभिनेता प्रथमेश परबचा गर्लफ्रेंड क्षितिजा घोसाळकरबरोबर नुकताच साखरपुडा सोहळा संपन्न झाला. अशातच आणखी एका मराठमोळ्या दिग्दर्शकाचा ‘व्हॅलेंटाईन डे’चे औचित्य साधत साखरपुडा पार पडला.
प्रथमेश परबनंतर राष्ट्रीय पुरस्कार विजेते दिग्दर्शक समीर विद्वांस यांनी साखरपुडा केला आहे. साखरपुड्याचे काही खास फोटो शेअर करत त्यांनी चाहत्यांना ही आनंदाची बातमी दिली आहे. जुईली सोनलकरबरोबर समीर यांचा साखरपुडा पार पडला असून या साखरपुडा सोहळ्याचे खास फोटो सोशल मीडियावर शेअर करण्यात आले आहेत.
समीर-जुईली हे दोघे अनेक वर्षांपासून एकमेकांबरोबर काम करत आहेत. जुईलीदेखील गेली अनेक वर्ष सिनेक्षेत्रात कार्यरत आहे. दोघांचे अनेक एकत्र फोटो सोशल मीडियावर पाहायला मिळत आहेत. अनेक वर्षांची मैत्री आणि प्रेम, यानंतर अखेर दोघांनी एकत्र येण्याचा निर्णय घेतला. त्यामुळे नुकताच साखरपुडा करत या दोघांनी त्यांच्या आयुष्याच्या नवीन प्रवासाला सुरुवात केली आहे.
समीरने त्याच्या इन्स्टाग्राम अकाऊंटद्वारे साखरपुड्याचे खास फोटो शेअर करत “Hitched” आणि “we decided on forever” म्हणजेच आम्ही आयुष्यभरासाठी एकमेकांबरोबर अडकलो आहोत असं म्हटलं आहे. समीरने शेअर केलेल्या या फोटोवर बॉलिवूड अभिनेत्री कियारा अडवाणीसह श्रेया बुगडे, मयुरी देशमुख, अनघा अतुल, जयवंत वाडकर, आशय कुलकर्णी, सुयश टिळक, ऋषी सक्सेना, सायली संजीव, मेघा धाडे, वैदही परशुरामी यांसह अनेक कलाकारांनी कमेंट्स करत त्याला शुभेच्छा दिल्या आहेत.
आणखी वाचा – डिनर डेट, रोमॅंटिक अंदाज अन्..; लग्नानंतर प्रथमेश व मुग्धाने साजरा केला पहिला व्हॅलेंटाईन डे, फोटो व्हायरल
दरम्यान समीर यांनी आजवर अनेक लोकप्रिय चित्रपटांचे दिग्दर्शन केलं आहे. ‘टाइम प्लिज’, ‘धुरळा’, ‘वाय झेड’, ‘डबल सीट’, ‘आनंदी गोपाळ’ सारख्या अनेक मराठी चित्रपटाचे दिग्दर्शन केलं आहे. तसेच कियारा अडवाणी व कार्तिक आर्यन यांची मुख्य भूमिका असलेला ‘सत्य प्रेम की कथा’ हा त्यांचा पहिला हिंदी चित्रपट होता.