जगभरात सर्वत्र यंदाच्या ‘कान्स फिल्म फेस्टिव्हल २०२४’ची चर्चा सुरु आहे. यंदाच्या कान्स फिल्म फेस्टिव्हलमध्ये भारताने बाजी मारली. कान्समुळे गेल्या काही दिवसांत मराठी सिनेसृष्टीतील एक नाव समोर आलं आहे.ते चर्चेत आलेलं नाव म्हणजे छाया कदम. अभिनेत्री छाया कदम यांच्या कामाचं मराठीसह हिंदी सिनेसृष्टीत जोरदार कौतुक होतं आहे. पायल कपाडिया दिग्दर्शित ‘ऑल वी इमॅजिन ॲज लाइट’ चित्रपटाचा ‘कान फिल्म फेस्टिव्हल’मध्ये गौरव झाला आणि छाया कदम यांच्या भूमिकेचं कौतुक झालं. (Ravi Jadhav On Chhaya Kadam)
भारतात परतल्यानंतरही छाया कदम यांचं भारतवासीयांनी स्वागत करत त्यांच्या कामाची दखल घेतली. सोशल मीडियावर छाया कदम चर्चेत आलेल्या पाहायला मिळत आहेत. अशातच छाया कदम यांच्या या यशाचं सेलिब्रेशन मराठमोळा दिग्दर्शक रवी जाधव यानेही साजरं केलं असल्याचं पाहायला मिळत आहे. रवी याने सोशल मीडियावर एक व्हिडीओ पोस्ट केला आहे. या व्हिडीओमध्ये रवी आणि त्याच्या कुटुंबीयांनी छाया कदमला घरी बोलावून तिचं स्वागत केलं आहे.
छाया यांना घरी बोलावून जाधव कुटुंबीयांनी पुष्पगुच्छ देत स्वागत केलं आहे. शिवाय तिला भेटवस्तू म्हणून साडीही दिली आहे. यावेळी त्यांनी एन्जॉय केलेलंही पाहायला मिळत आहे. हा व्हिडीओ शेअर करत त्याने कॅप्शन देत असं म्हटलं आहे की, “अनुसया सेनगुप्ता, पायल कपाडिया, चिदानंद एस नाईक, मानसी माहेश्वरी आणि आमच्या हक्काच्या छाया कदम यांच्या उल्लेखनीय कलागुणांचा गौरव करुन आम्ही ‘कान्स २०२४’ मधील उल्लेखनीय कामगिरीचा आनंद उत्सवात एकत्र आलो आहोत. या व्यक्तीने भारताला अभिमान वाटावा अशी कामगिरी केली. तसेच भारतीय चित्रपट निर्मितीच्या जगात नवीन ऊर्जा आणि प्रेरणा दिली”.
पुढे त्याने लिहिलं आहे की, “विशेषत: आपल्या प्रिय असलेल्या छाया यांच्या माध्यमातून आम्ही सर्व विजेत्यांचे मनःपूर्वक आभार व्यक्त करतो. त्यांच्या समर्पण, सर्जनशीलता आणि उत्कटतेने केवळ प्रतिष्ठित प्रशंसाच मिळवली नाही तर इंडी चित्रपट समुदायाला प्रोत्साहन दिले. भविष्यातील चित्रपट निर्मात्यांसाठी या यशाने दरवाजे उघडले आणि मार्ग प्रकाशित केले आहेत.जागतिक सिनेमॅटिक लँडस्केपवर त्यांनी केलेले सखोल प्रभाव ओळखून आपण त्यांचे यश आनंदाने व अभिमानाने साजरे करुया”.