महाराष्ट्रातील विनोदी कलाकारांच्या यादीत सर्वात अग्रणीय यादीत जिचं नाव घेतलं जात ती अभिनेत्री म्हणजे विशाखा सुभेदार. विशाखाने आजवर विविध कार्यक्रमातून प्रेक्षकांचं मनोरंजन केलं आहे. तिने साकारलेली प्रत्येक भूमिका प्रेक्षकांच्या बऱ्याच पसंतीस पडल्या. तिच्या विनोदाच्या शैलीमुळे तिने प्रेक्षकांच्या मनात आपली वेगळी जागा मिळवली. आज अभिनय क्षेत्रात तिची वेगळी अशी ओळख आहे. विशाखाचा या क्षेत्रातील प्रवास जितका खडतर होता तितकच तिच्या वैयक्तिक आयुष्यातील प्रवासातही चढ-उतार भोगावे लागले. (Vishakha Subhedar told story about her wedding)
सुरुवातीला त्यांच्या घरात तिच्या लग्नाला नकार होता. त्यांचे आई-वडील त्यांच्या लग्नासाठी तयार नव्हते. कारण त्यांना अभिनय क्षेत्रच मान्य नव्हतं. त्यामुळे या क्षेत्रातील तिच्यासाठी नवरा कसा मान्य असेल! याबद्दल बोलताना विशाखा सांगते, “आमच्या लग्नासाठी माझ्या आजीने पुढाकार घेतला. तिने आई-बाबांना सांगितलं की मुलीला या क्षेत्रात आवड आहे. आपल्या जातीतला मुलगा शोधायला गेला तर मराठा जातीत तिला या क्षेत्रात पुढे करिअर करु देणारा मुलगा भेटला नसता. सुदैवाने असा मुलगा मिळतो आहे जो तिला या क्षेत्रात पुढे जाण्याची संधी देईल. तर तु का थांबवतो आहेस?”
पुढे विशाखा सांगते की, “अगोदर मुलींना या क्षेत्रात स्वतःचं अस्तित्व निर्माण करण्याची तेवढी मुभा नव्हती. आजची परिस्थिती खूप वेगळी आहे आजच्या मुलींना ही संधी मिळते. त्यानंतर माझ्या आई-वडिलांनी विचार बदलला. आजी एवढं सांगत आहे तर आपण आई-वडील म्हणून तिच्या सुखाचा विचार करायला हवा. त्यानंतर आमच्या लग्नाला आई-वडिलांनी परवानगी दिली. पण माझ्या लग्नावर आजी-आजोबांनी एक अट सांगितली होती”.
पुढे त्या अटीबद्दल सांगताना ती म्हणाली, “जर आमची मुलगी भविष्यात टिव्हीवर दिसली पाहिजे तरच आम्ही या लग्नाला होकार देऊ. या एका अटीवर आमचं लग्न झालं. आता मात्र माझा नवरा मला सांगतो की, मी तुझ्या आजोबांची अट पूर्ण केली”, आज विशाखाच्या आजी-आजोबांची अट व स्वप्न पुर्ण झालं. विशाखा टिव्हीवर नुसत्या दिसतच नाहीत तर त्यांच्या दमदार अभिनयाने प्रेक्षकांची मनंही जिंकतात.
