Tejashree Pradhan Passes Away : मराठीतीली सुप्रसिद्ध अभिनेत्री तेजश्री प्रधानच्या आईचं निधन झालं आहे. आईच्या निधनानंतर तेजश्रीसह तिच्या संपूर्ण कुटुंबाला मोठा दुःखद धक्का बसला आहे. दोन दिवसांपूर्वीच तेजश्री दिवाळी सेलिब्रेशनसाठी अशोक सराफ व निवेदिता सराफ यांच्या घरी गेली होती. त्यादरम्यानचे फोटोही तिने इन्स्टाग्राम अकाऊंटद्वारे शेअर केले होते. गुरुवारी (१६ नोव्हेंबर) तेजश्रीच्या आईचं निधन झालं असल्याची माहिती समोर आली आहे. मात्र त्यांचं निधन नेमकं कशामुळे झालं हे अद्याप समोर आलेलं नाही. (Tejashree Pradhan Passes Away)
तेजश्रीने यंदाची दिवाळी अगदी उत्साहात साजरी केली. कुटुंबियांबरोबरही तिने एकत्रित वेळ घालवला. शिवाय सोशल मीडियाद्वारेही तेजश्री आईबरोबरचे काही फोटो शेअर करताना दिसली. इतकंच नव्हे तर काही मुलाखतींमध्येही तिने आईबाबात भाष्य केलं होतं. प्रत्येक कठिण प्रसंगात तेजश्रीला तिच्या आईची साथ मिळाली. वडिलांबरोबरच आईनेही तिला तिच्या क्षेत्रामध्ये पुढे जाण्यास पाठिंबा दिला. पण आता आईच्या अचानक जाण्याने तेजश्री कोलमडून गेली आहे.
सध्या स्टार प्रवाह वाहिनीवरील ‘प्रेमाची गोष्ट’ या मालिकेत तेजश्री मुख्य भूमिकेत काम करताना दिसत आहे. या मालिकेच्यानिमित्ताने तिने बराच काळानंतर छोट्या पडद्यावर कमबॅक केलं. या मालिकेतील तिच्या भूमिकेला प्रेक्षकांचं भरभरुन प्रेम मिळत आहे. आता या दुःखामधून तेजश्री स्वतःला कशी सावरणार? असा प्रश्न तिच्या चाहत्यांनाही आहे.
