बरेच असे कलाकार आहेत जे त्यांच्या वैयक्तिक आयुष्यामुळे चर्चेत असतात. त्यांच्या वैयक्तिक आयुष्यातील घडामोडी त्या नेहमीच सोशल मीडियावरून चाहत्यांसह शेअर करत असतात. कित्येकदा या कलाकार मंडळींच्या घराबद्दल जाणून घ्यायला चाहते उत्सुक असतात. प्रेक्षकांनाही कलाकारांच्या घराबद्दल जाणून घ्यायला आवडते. बरीच अशी कलाकार मंडळी आहेत, ज्यांनी आजवर त्यांच्या गावाबाहेर जमीन म्हणा वा फार्महाऊस घेऊन स्वप्न पूर्ण केली आहेत. (Varsha Dandle New Farmhouse)
याचं ताज उदाहरण द्यायचं म्हणजे अभिनेत्री प्राजक्ता माळीने घेतलेलं कर्जत येथील फार्महाऊस. ‘प्राजक्तकुंज’ असं नाव देत प्राजक्ताने निसर्गाच्या कुशीत फार्महाऊस घेतलं आहे. प्राजक्ताच्या या फार्महाऊसच बरंच कौतुकही झालं. नुकतीच ‘महाराष्ट्राची हास्यजत्रे’ची टीम प्राजक्ताच्या वाढदिवसानिमित्त तिच्या फार्महाऊसला पोहोचली होती. आता प्राजक्ता पाठोपाठ आणखी एका सिनेसृष्टीतील कलाकाराचं तीच फार्महाऊसच स्वप्न पूर्ण झालं आहे.
मालिकाविश्वात लोकप्रिय असलेल्या अभिनेत्री वर्षा दांदळे यांनी त्यांच्या स्वप्नातलं फार्महाऊस खरेदी केले आहे. अभिनेत्री वर्षा दांदळे यांनी नाशिकमध्ये फार्म हाऊस बांधल्याच सांगत त्याची झलक सोशल मीडियावरून शेअर केली आहे. आजवर वर्षा दांदळे यांनी छोट्या पडद्यावरून प्रेक्षकांच्या मनात घर केलं. त्यांच्या प्रत्येक भूमिकेला प्रेक्षकांनी भरभरून प्रतिसाद दिला. त्या नेहमीच त्यांच्या रोजच्या जीवनात घडणाऱ्या घडामोडींचे अनेक व्हिडीओ करून सोशल मीडियावरून शेअर करत असतात. सोशल मीडियावर वर्षा दांदळे यांचा उत्तम वावर असतो. अशातच त्यांनी सोशल मीडियावरून शेअर केलेल्या एका व्हिडीओने साऱ्यांचं लक्ष वेधून घेतलं आहे.
या व्हिडीओमध्ये त्यांनी त्यांच्या नाशिकजवळ बांधलेल्या फार्म हाऊसची झलक दाखवली. व्हिडीओ शेअर करत त्या म्हणाल्या की, “मी नाशिकमधील त्र्यंबकेश्वर तालुक्यातील पिंपरी या गावी आले आहे. तिथे आम्ही दहा गुंठे जागा विकत घेतली आहे आणि आमचं छोटसं घर बांधलं आहे. मी व माझे मिस्टर अधून मधून इथे येत असतो. इथे आम्ही आंब्याची झाडंही लावली आहेत. ती अजून छोटी आहेत. मजा येते अशा निसर्गरम्य वातावरणात राहायला. हे स्वप्न होतं माझं ते आता देवाच्या दयेने पूर्ण झालं आहे.”
