सध्या ओटीटीमुळे अनेक कलाकारांसाठी अभिनयाच्या कक्षा रुंदावल्या आहेत. मराठीत काम केल्यानंतर अनेक मराठी कलाकार ओटीटी क्षेत्रात आपले नशीब आजमावतात. यात अमेय वाघ, अमृता सुभाष, वैदही परशुरामी, राधिका आपटे, जितेंद्र जोशी, सौरभ गोखले, अनुजा साठे यांसारख्या अनेक कलाकारांनी आपला झेंडा रोवला आहे. अशातच आता यात आणखी एका मराठी अभिनेत्रीची भर पडणार आहे आणि ही मराठी अभिनेत्री म्हणजे शर्मिष्ठा राऊत.
मराठी नाटक, मालिका, चित्रपट या तिन्ही माध्यमांत अभिनय करत शर्मिष्ठाने प्रेक्षकांच्या मनावर आपली छाप सोडली आहे. तसेच नुकतेच गेल्या वर्षी शर्मिष्ठाने निर्मिती क्षेत्रातदेखील पदार्पण केलं आहे. ‘तुला शिकवीन चांगलाच धडा’ ही शर्मिष्ठाची पहिली निर्मिती असलेली मालिका आहे. अशातच अभिनेत्री एका हिंदी वेब सीरिजमध्ये झळकणार आहे.
शर्मिष्ठाने स्वतः सोशल मीडियावर पोस्ट शेअर करत चाहत्यांना ही आनंदाची बातमी दिली आहे. अभिनेत्री ‘रायसिंघानिया वर्सेज रायसिंघानिया’ या हिंदी वेब सीरिजमध्ये पाहायला मिळणार आहे. १२ फेब्रुवारीला ही सीरिज ‘सोनी लिव्ह’वर प्रदर्शित होणार आहे. या सीरिजमध्ये शर्मिष्ठा कुठली भूमिका साकारणार आहे? हे अद्याप समोर आलेलं नाही.
दरम्यान, शर्मिष्ठाने शेअर केलेल्या या पोस्टवर चाहत्यांनी लाईक्स व कमेंट्सद्वारे चांगलाच प्रतिसाद दिला आहे. तिच्या या पोस्टखाली कमेंट्समध्ये अनेकांनी तिच्या सीरिजमधील नवीन भूमिकेसाठी उत्सुकता दाखवली आहे.
