‘नवरा माझा नवसाचा’ या चित्रपटात सचिन पिळगावकर, अशोक सराफ, जॉनी लिव्हर यांच्या विनोदी अभिनयाने धमाल उडवून दिली होती. सचिन पिळगावकर, सुप्रिया पिळगावकर, अशोक सराफ, जॉनी लीव्हर, रीमा लागू, विजय पाटकर, निम्रिती सावंत, वैभव मांगले, प्रदीप पटवर्धन यांच्या महत्त्वाच्या भूमिका असणारा हा चित्रपट २००४ साली प्रदर्शित झाला आणि आज इतक्या वर्षांनंतरही या चित्रपटाची क्रेझ तितकीच पाहायला मिळत आहे.
आजही हा चित्रपट तितक्याच आवडीने प्रेक्षकांकडून पाहिला जातो. चित्रपटात सचिन पिळगावकर, सुप्रिया पिळगावकर, अशोक सराफ, जॉनी लीव्हर, रीमा लागू, विजय पाटकर, वैभव मांगले, प्रदीप पटवर्धन यांच्यासह अभिनेते जयवंत वाडकर यांनीदेखील महत्त्वाची भूमिका साकारली होती. जागे असतानाच घोरणाऱ्या व्यक्तीच्या पात्राने चित्रपटात धम्माल उडवून दिली होती.
आपल्या नानाविध भूमिकांनी चर्चेत असणारे जयवंत वाडकर हे सोशल मीडियावरदेखील तितकेच सक्रिय असतात आणि या सोशल मीडियाद्वारे ते त्यांच्या कामाची माहिती देत असतात. अशातच त्यांनी नुकताच त्यांच्या सोशल मीडियाद्वारे ‘नवरा माझा नवसाचा’ या चित्रपटाच्या दुसऱ्या भाग येणार असल्याची माहिती दिली आहे. जयवंत वाडकर यांनी त्यांच्या इन्स्टाग्राम अकाऊंटद्वारे ‘नवरा माझा नवसाचा २’ या चित्रपटाच्या पोस्टरचा एक फोटो शेअर केला असून याखाली त्यांनी उद्यापासून चित्रपटाच्या चित्रीकरणाला सुरुवात होणार असल्याचेही म्हटले आहे.
जयवंत यांनी शेअर केलेल्या या पोस्टवर चाहत्यांनी लाइक्स व कमेंट्सद्वारे चांगलाच प्रतिसाद दिला आहे. तसेच अनेकांनी या चित्रपटाबद्दल उत्सुकता दाखवली आहे. दरम्यान, अनेकांनी या चित्रपटात अभिनेते प्रदीप पटवर्धन यांना मिस करणार असल्याचेही म्हटले आहे. त्यामुळे हा चित्रपट आता कधी प्रदर्शित होणार यासाठी अनेक चाहते मंडळी उत्सुक आहेत.