स्वतःच, हक्काचं घर असावं असं प्रत्येकाला वाटतं. आणि प्रत्येकाने पाहिलेलं हे स्वप्न पूर्ण करण्यासाठी जो तो धडपड करत असतो. घर घेतल्यानंतर घराची सजावट ते घरावर लावायची नेमप्लेट इथपर्यंत सर्व काही जसं जमेल तसं करत असतो. असंच काही वर्षांपूर्वी स्वतःच्या घराचं स्वप्न एका मराठमोळ्या अभिनेत्रीचं पूर्ण झालं. अभिनेत्री समिधा गुरु हीच घर घेण्याचं सवपन पूर्ण झालं शिवाय तिला हवी तशी नेमप्लेट दाराबाहेर असण्याची तिची इच्छाही पूर्ण झाली. ही तिची इच्छा तिच्या जवळच्या व्यक्तीने पूर्ण केली. (Samidha Guru On Nameplate)
इट्स मज्जाच्या माझ्या घराची गोष्ट या कार्यक्रमात बोलत असताना समिधाने घराबद्दलच्या अनेक आठवणी ताज्या केल्या. यावेळी तिने तिच्या दारावर असणाऱ्या नेमप्लेटमागील स्टोरी सांगितली. याबाबत बोलताना समिधा म्हणाली, “‘गुरु’ या आडनावांतच आमच्या सर्वकाही आहे. मला लहानपणापासूनच प्राजक्ताची फुलं आवडतात. माझ्या घरी दरवाज्यातच प्राजक्ताचं झाड होतं आणि त्याची पडलेली फुलं मी वेचून दररोज देवाला वाहायचे. या लहानपणीच्या आठवणी असल्याने मला ती आवड जोपासायची होती. पण इथे कुठे प्राजक्ताचं झाड लावणार.
समिधा पुढे म्हणाली, “मग दाराबाहेर प्राजक्ताचं झाड नाहीतर निदान नेमप्लेट असावी असं मी घर घेतलं तेव्हा ठरवलं होतं. आणि तेव्हापासून मी त्या नेमप्लेटच्या शोधात होते. ही नेमप्लेट माझी नणंद विदुला पाठक यांनी बनवली आहे. त्यांना मी सांगितलं की, मला अशी नेमप्लेट हवी आहे. यावर ती म्हणाली, तू शोधते कशाला मी बनवते. मी विचारलं तुम्हाला येते का ? तर त्या नाही म्हणाल्या. क्रिएटिव्ह काम त्या करतच असतात. त्यावेळी माझ्या घराची नेमप्लेट बनवण्यासाठी, ती प्राजक्ताची फुलं बनवण्यासाठी त्या माझ्यासाठी ती कला शिकल्या.”
नेमप्लेटची स्तुती करत समिधा म्हणाली, “मला त्यांनी तुला हवी तशी नेमप्लेट बनवून देणार असं वचन दिलं होतं, त्याप्रमाणे त्यांनी मला नावाची पाटी बनवून दिली. ज्यावेळी मी ती नेमप्लेट पाहिली तेव्हा मला स्वतःला आश्चर्याचा धक्का बसला. इतकी सुंदर नेमप्लेट असेल अशी मी कल्पना केली नव्हती. ही नावाची पाटी माझ्यासाठी खूप खास आहे. आज तिच्यामुळे मला आवडणार प्राजक्ताचं झाड माझ्या दाराबाहेर आहे.”
