आदेश बांदेकर यांच्या अभिनयाचे, सूत्रसंचालनाचे लाखो चाहते दिवाने आहेत. ‘होम मिनिस्टर’ या कार्यक्रमामुळे आदेश बांदेकर यांना खऱ्या अर्थाने लोकप्रियता मिळाली. आदेश यांना महाराष्ट्राचे भावोजी या म्हणूनचं प्रसिद्धी मिळाली. या कार्यक्रमाद्वारे ते संपूर्ण महाराष्ट्रभर फिरत असतात. सगळ्यांचे लाडके भावोजी आजवर महाराष्ट्रातील प्रत्येक घरात प्रसिद्ध आहेत. इतकंच नव्हे तर प्रत्येक महिलेला आपल्या लाडक्या भावोजींनी घरी यावं असं वाटतं असतं. या कार्यक्रमामुळे आदेश यांची केवळ महाराष्ट्रातच नव्हे तर जगभरात लोकप्रियता आहे. (Suchitra Bandekar On Home Minister)
मराठी मनोरंजन सृष्टीतील आदेश बांदेकर व सुचित्रा बांदेकर ही लोकप्रिय जोडी आहे. अभिनयशिवाय दोघेही त्यांच्या वैयक्तिक कारणामुळेही नेहमीच चर्चेत असतात. ही जोडी गेल्या अनेक वर्षांपासून मनोरंजन क्षेत्रात सक्रिय असून सर्वत्र दोघांचा मोठा चाहतावर्ग आहे. आदेश हे ‘होम मिनिस्टर’ कार्यक्रमातून घराघरात पोहोचले आहेत. तर सुचित्रा अनेक चित्रपटांमधून प्रेक्षकांच्या भेटीला आल्या होत्या. दोघांनी त्यांच्या कलाकृतींमधून प्रेक्षकांना आपलंसं केलं आहे. . आदेश व सुचित्रा यांच्या प्रेमाचे किस्से नेहमीच चर्चेत असतात.
सुचित्रा यांनी नुकतीच सुलेखा तळवलकर यांच्या ‘दिल के करीब’ या कार्यक्रमात हजेरी लावली होती. यावेळी त्यांनी बरेच किस्से सांगितले. यावेळी बोलताना सुचित्रा यांनी आदेश यांच्या ‘होम मिनिस्टर’ कार्यक्रमातील पैठणीमागील किस्सा सांगितला आहे. सुचित्रा म्हणाल्या, “खूप वर्षांपूर्वीची गोष्ट आहे. तेव्हा फार पैसे हातात नसायचे. त्यावेळी आमच्या सोसायटीमधील सर्व बायकांनी ठरवलं होतं की, पैठणी विकत घ्यायची. आणि तेव्हा आदेशचा ‘होम मिनिस्टर’ हा कार्यक्रम नव्हता. आदेशच्या या कार्यक्रमाला आज २० वर्षे झाली. त्यापूर्वीची ही गोष्ट आहे. त्यावेळी आम्ही सगळ्याजणी पैसे काढायचो आणि जिचा नंबर लागेल तिला ती पैठणी मिळायची. अशी पैठणीची भिशी आम्ही काढायचो. आणि तेव्हा ही गोष्ट आदेशाला मी सांगितली”.
पुढे त्या म्हणाल्या, “तेव्हा तो म्हणाला, तुमच्यासाठी इतकी पैठणी महत्त्वाची आहे. हे त्याला जेव्हा कळलं त्यानंतर तो झी वाहिनीशी बोलला आणि त्याने त्यांनतर भेटवस्तू म्हणून या कार्यक्रमात पैठणी द्यायला सुरुवात केली. ज्या स्त्रियांसाठी पंधरा ते वीस हजाराची पैठणी घेणं कठीण असतं, त्यासाठी त्याने हा नवा उपक्रम सुरु केला. तर पैठणी देण्याचं क्रेडिट हे पूर्णतः माझं आहे”.
