Reshma Shinde Diwali : सध्या दिवाळीची सर्वत्र धामधूम सुरु आहे. अनेक सेलिब्रिटी कपलची यंदा लग्नानंतरची पहिली दिवाळी आहे. त्यामुळे ही मंडळी अगदी थाटामाटात, पारंपरिक अंदाजात यंदाची दिवाळी साजरी करताना दिसले. अशातच मराठमोळी अभिनेत्री रेश्मा शिंदे हिने देखील तिची लग्नानंतरची पहिली दिवाळी अगदी थाटामाटात साजरी केल्याचं पाहायला मिळत आहे. रेश्मा शिंदेने २९ नोव्हेंबर २०२४ रोजी लग्न केले. लग्नाचे फोटो आणि व्हिडीओ अभिनेत्रीनं शेअर करत ही आनंदाची बातमी चाहत्यांसह शेअर करत सुखद धक्का दिला. अभिनेत्रीचा नवरा पवन हा साऊथ इंडियन आहे.
यंदा रेश्मा आणि पवनने त्यांच्या घरी लग्नानंतरची पहिली दिवाळी साजरी केली. रेश्माने दिवाळी पाडव्यानिमित्त हे खास क्षण सोशल मीडियावर शेअर केले. समोर आलेल्या या फोटोंमध्ये ती पतीला उटणं लावताना दिसत आहे. त्याचबरोबर रेश्माच्या व्हिडीओमध्ये एक चिमुकलाही दिसतोय. आणि तो देखील अभ्यंगस्नान करताना दिसत आहे. यावेळी रेश्माच्या नवऱ्याचा साऊथ इंडियन लूक लक्ष वेधून घेत आहे.
लग्नानंतरचा प्रत्येक सण रेश्मा हौसेने साजरा करताना दिसते. रेश्माचा नवरा हा साऊथ इंडियन असूनही त्याने पत्नीला साथ देत अगदी मराठमोळ्या अंदाजात प्रत्येक सण साजरा केला आहे. रेश्मा सोशल मीडियावर बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात राहत असते. नवऱ्याबरोबरचं बॉण्डिंग नेहमीच ती शेअर करताना दिसली आहे. आताही तिच्या पहिल्या दिवाळसणाच्या फोटोंवर कलाकार मंडळींनी कमेंट करत पसंती दर्शविली आहे.
आणखी वाचा – घरच्या लक्ष्मीचं औक्षण, मुलांचं अभ्यंगस्नान आणि…; रितेश देशमुखने जपली परंपरा, यंदा मुंबईत साजरी केली दिवाळी
सध्या रेश्मा स्टार प्रवाह वाहिनीवरील घरोघरी मातीच्या चुली या मालिकेत महत्त्वपूर्ण भूमिका साकारताना दिसत आहे. यापूर्वीही रेश्माने मराठी मालिकांमधून स्वतःची ओळख निर्माण केली. वैयक्तिक आयुष्याबाबत बोलायचं झालं तर रेश्माने साऊथ इंडियन पवनसह लग्नगाठ बांधली आहे. अभिनयाची धुरा सांभाळत ती तिच्या संसाराकडे, कुटुंबाकडेही लक्ष देताना दिसते.
