अभिनेत्री प्रिया बापट व अभिनेता उमेश कामत ही लोकप्रिय जोडीपैकी एक जोडी आहे. तब्बल १८ वर्ष प्रेमात आकंठ बुडालेल्या या जोडप्याच्या संसाराला १२ वर्षे पूर्ण झाली आहेत. नाटक, मालिका व चित्रपटांमध्ये ही जोडी एकत्र दिसली असून या दोघांनीही त्यांच्या अभिनय कौशल्यावर प्रेक्षकांच्या मनावर अधिराज्य गाजवलं. या जोडीची ऑफस्क्रीन केमिस्ट्री जितकी चाहत्यांना आवडते, तितकीच ती ऑनस्क्रीन पाहायलाही आवडते. प्रिया व उमेश हे दोघे सोशल मीडियावर ही बऱ्यापैकी सक्रिय असतात. नेहमीच ते एकत्र फोटो शेअर करून चाहत्यांच्या संपर्कात असतात. (Priya Bapat And Umesh Kamat)
दिवाळीनिमित्त नुकतीच त्यांनी शेअर केलेली पोस्ट ही लक्षवेधी ठरली. पारंपरिक लूकमधील फोटो शेअर करत या जोडीने चाहत्यांना दिवाळीच्या शुभेच्छा दिल्या. अशातच दिवाळीनिमित्त घेतलेला प्रिया व उमेशचा एक व्हिडीओ व्हायरल होताना दिसत आहे. ‘मिरची मराठी’ या युट्युब चॅनेलला दिलेल्या मुलाखतीत प्रियाने ‘ दिवाळी पाडवा’ कसा साजरा करतात याबद्दल भाष्य केलं आहे. यावेळी बोलताना तिने दिवाळी पाडव्याची आठवण शेअर केली.
प्रिया म्हणाली, “माझ्या अशा काही अपेक्षा नसतात, की पाडव्याला मला नवऱ्याने भेटवस्तू द्यावी वा ‘व्हॅलेंटाईन डे’ला गिफ्ट द्यावं. मला काहीही फरक पडत नाही. मला काहीही देऊ नका. माझी ही इच्छा असते की, माझ्या नवऱ्याने त्या दिवशी दिवसातील काही खास क्षण मला द्यावेत, म्हणजे जसं की, एक मिठी वा रस्त्यातून चालताना धरलेला हात. माझ्या यापलीकडे काहीच अपेक्षा नाहीत. मला कधीही असं वाटत नाही की, दिवाळीला मला काय भेटवस्तू देणार, किंवा पाडव्याला मला ओवाळणी म्हणून काय देणार. आज लक्ष्मीपूजन आहे तर आज सोनं घ्यायलाच हवं असं मला काहीही वाटत नाही. मला फराळ करायला आवडतो, आणि मी केलेला फराळ त्याला आवडतो. त्यामुळे कोणत्याही सणवाराला जे करायचं असतं ते मला मनापासून करायला आवडतं”.
दहा वर्षांपूर्वी प्रिया व उमेश यांनी ‘नवा गडी नवं राज्य’ हे नाटक केलं होतं. पण त्याआधी हे दोघं एकमेकांना डेट करत होते. अखेर २०११ मध्ये प्रिया व उमेश लग्नबंधनात अडकले. तेव्हापासून ही जोडी कामाबरोबरच त्यांच्या आयुष्यातील अनेक सुंदर क्षण व्यतीत करताना दिसतात. अभिनयाबरोबरच ही जोडी त्यांच्या चाहत्यांच्या संपर्कात राहण्यासाठी सोशल मीडियावर सक्रिय असतात.
