मराठी नाटक, मालिका व चित्रपट यातून आपल्या दमदार अभिनयाने प्रेक्षकांचे मनोरंजन करणारी अभिनेत्री म्हणजे मृण्मयी देशपांडे. अभिनयाव्यतिरिक्त अभिनेत्री सूत्रसंचालनदेखील करते. मृण्मयी देशपांडे व तिचा पती स्वप्नील राव ही जोडी सोशल मीडियावर चांगलीच सक्रिय असते. या दोघांची केमिस्ट्रीही प्रेक्षकांना खूप आवडते. मृण्मयी व स्वप्निल सोशल मीडियावर बऱ्यापैकी सक्रिय असतात. एकमेकांबरोबचे अनेक फोटो व व्हिडीओ शेअर करत ते चाहत्यांच्या संपर्कात राहत असतात. (Mrunmayee Deshpande on Instagram)
गेल्या काही वर्षांपासून मृण्मयी अभिनयाव्यतिरिक्त शेती करण्यात चांगलीच रमली असल्याचे पाहायला मिळत आहे. अभिनयातून मोकळा वेळ मिळाला की ती तिच्या पतीबरोबर महाबळेश्वर येथे शेती करत असते. ती अनेकदा शेतातले फोटो व व्हिडीओही चाहत्यांसह शेअर करत असते. त्यानंतर आता तिने शेतीपूरक व्यवसायही सुरू केला आहे. अशातच मृण्मयीने तिच्या इन्स्टाग्राम लाईव्हद्वारे तिच्या शेतीची एक खास झलक चाहत्यांबरोबर शेअर केली आहे. यात तिने शेतीबद्दलची माहितीसुद्धा दिली आहे.
गेले काही दिवस मृण्मयी तिच्या बहिणीच्या लग्नामध्ये चांगलीच व्यस्त होती. मात्र या व्यस्ततेमधून वेळ काढून तिने शेतात काही पिकांची लागवड केली आहे. फराशी, मुळा, बीट, टोमॅटो, स्ट्रॉबेरी यांसारख्या पिकांची लागवड या शेतात केली असल्याचे पाहायला मिळत आहे. मृण्मयीने सेंद्रिय पद्धतीने शेती करत शेती व्यवसाला चालना देत आहे. स्वप्नीलला सहकार्य करत मृण्मयीने या शेतीची लागवड केली आहे.
दरम्यान, महाबळेश्वरमधील मालुसरे या गावात मृण्मयी तिची शेती करत असून या शेतीसाठी तिला कुटुंबियांचीदेखील मदत होत असल्याचे पाहायला मिळत आहे. तिने शेअर केलेल्या व्हिडीओमध्ये तिची आई, नवरा व इतर भावंडेही शेती करताना पाहायला मिळत आहे. तसेच या व्हिडीओखाली चाहत्यांनी लाईक्स व कमेंट्सद्वारे चांगलाच प्रतिसाद दिला आहे. तसेच अनेकांनी या कमेंट्समध्ये तिचे कौतुकही केले आहे.