‘प्रेम करु या खुल्लम खुल्ला’ या चित्रपटाचं मराठी कलाविश्वामध्ये अढळ स्थान आहे. याच चित्रपटामुळे मराठी कलाविश्वाला किशोरी शहाणे हा नवा चेहरा मिळाला. वयाच्या अवघ्या १७व्या वर्षी पहिला चित्रपट करणाऱ्या अभिनेत्रीने केवळ मराठीच नव्हे तर हिंदी चित्रपटसृष्टीतही नावलौकिक मिळविला. किशोरी यांनी आजवर त्यांच्या अभिनयाने व नृत्यशैलीने सिनेरसिकांच्या मनावर अधिराज्य गाजवलं आहे. किशोरी या त्यांच्या व्यावसायिक आयुष्याबरोबरच वैयक्तिक आयुष्यामुळेही चर्चेत असतात . (Kishori Shahane On Social Media)
अशातच ‘झी युवा’च्या इंस्टाग्राम अकाउंटवरुन शेअर केलेल्या पोस्टमध्ये किशोरी शहाणे यांची मुलाखत समोर आली आहे. यावेळी बोलताना किशोरी यांनी फॉलोअर्सची संख्या अधिक असणाऱ्यांना मिळणार प्राधान्य कितपत योग्य आहे याबाबत भाष्य केलं आहे. यावेळी किशोरी यांना, आजकाल एक ट्रेंड निघाला आहे की, ज्यांना सोशल मीडियावर खूप फॉलोअर्स आहेत त्यांना पटकन काम मिळतं, ही गोष्ट किती खरी आहे आणि ऑडिशन न घेता केवळ फॉलोअर्सच्या संख्येवर तुम्हाला संधी दिली जाते?”, असा प्रश्न विचारला.
या प्रश्नाचं उत्तर देत किशोरी शहाणे म्हणाल्या, “हे खरं नाही. टॅलेंट हे आवश्यक आहे. स्क्रीनवर काम करताना तुमच्या डोळ्यातले भाव प्रेक्षकांना भावले तर तो खरा अभिनय, तर तुम्ही टिकू शकता. फॉलोअर्स अधिक असल्याने सुरुवातीला तुम्हाला काम करण्याची संधी नक्कीच मिळेल. पण सिनेसृष्टीतील लांबच्या प्रवासासाठी, लांब उडी घेण्यासाठी फॉलोअर्स अधिक असणं गरजेचं नाही. पण हेही खरं आहे की, फॉलोअर्सच्या संख्येत वाढ करणं आवश्यक आहे. माझं सुद्धा इंस्टाग्राम अकाऊंट आहे. मी सुद्धा फॉलोअर्स वाढण्यासाठी रील व्हिडीओ पोस्ट करत असते”.
किशोरी यांनी हिंदी तसेच मराठी मालिकांमध्ये महत्त्वपूर्ण काम करत प्रेक्षकांची मन जिंकली आहेत. ‘घर एक मंदिर’, ‘ जस्सी जैसी कोई नही’, ‘सिंदूर’ या हिंदी मालिकांमधील त्यांच्या भूमिका विशेष गाजल्या. तर ‘प्रेम करुया खुल्लम खुल्ला’, ‘वाजवा रे वाजवा’, ‘बाळाचे बाप ब्रह्मचारी’, ‘सगळीकडे बोंबाबोंब’ हे मराठी चित्रपट तुफान लोकप्रिय झाले.
