गेल्या काही दिवसांपासून मराठी अभिनेत्री हेमल इंगळेच्या लग्नाची चर्चा सुरु होती. जोडप्याचा साखरपुडा ऑगस्ट महिन्यात पार पडला होता. तिच्या या साखरपुडा सोहळ्यानंतर अनेकांना सुखद धक्का बसला होता. तेव्हापासून अनेकजण अभिनेत्रीच्या लग्नाची वाट पाहत होते आणि अखेर तिने लग्नगाठ बांधली आहे. साखरपुडा सोहळा झाल्यानंतर गेल्या महिन्यात हेमलचं केळवण, ग्रहमख आणि मेहंदी असे विधी पार पडले आणि काल (२ जानेवारी) रोजी हेमल विवाहबंधनात अडकली. आपल्या लाघवी सौंदर्याने व सहजसुंदर अभिनयाने हेमलने अनेक प्रेक्षकांची मनं जिंकली आहेत. अशी ही सुंदर अभिनेत्री नुकतीच विवाहबंधनात अडकल्यामुळे अनेक चाहत्यांनी आनंद व्यक्त केला आहे. (Hemal Ingle Wedding)
हेमलने लग्नात गुलाबी रंगाचा छान, सुंदर असा भरजरी लेहेंगा परिधान केला होता. या शिवाय या भरजरी लेहेंग्यावर मोकळे केस, गळ्यात नेकलेस आणि हातात चुडा असा सुंदर लूक केला होता. तर हेमलचा नवरा रौनक चोरडियाने लग्नात ऑफ व्हाइट रंगाची शेरवानी घातली होती. दोघे या खास लूकमध्ये अतिशय सुंदर दिसत होते. त्यांच्या या लग्नाचे फोटो व व्हिडीओ सध्या सोशल मीडियावर प्रचंड व्हायरल होत आहेत.
हेमल-रौनक यांचा विवाहसोहळा अगदी शाही पध्दतीने पार पडला. सोशल मीडियावर व्हायरल होत झालेल्या फोटो व व्हिडीमधून हे दोघे समुद्रकिनारी एका शांत ठिकाणी विवाहबंधनात अडकल्याचे दिसून येत आहे. हेमलने तिच्या लग्नात खास एन्ट्री घेतली. ‘आफ्रीन’ या गाण्यावर डान्स करत हेमलने सर्वांचं लक्ष वेधून घेतलं. यावेळी ती काहीशी भावुकही झाली आणि भावुक होताच रौनकने तिला सावरले. समुद्रकिनारी सुर्यास्ताच्या वेळेस हेमल-रौनक यांचा हा शाही विवाहसोहळा पार पडला आहे.
दरम्यान, हेमलच्या कामाविषयी सांगायचं झालं तर, ती नुकतीच सचिन पिळगावकर यांच्या ‘नवरा माझा नवसाचा २’ या चित्रपटातून प्रेक्षकांच्या भेटीला आली होती. यात तिने सचिन आणि सुप्रिया यांच्या मुलीची भूमिका साकारली होती. त्याआधी ती सचिन पिळगावकरांच्याच ‘अशी ही आशिकी’ या चित्रपटाततेही दिसली होती. हा तिच्या पदार्पणाचा चित्रपट होता. हेमलने नुकतंच लग्न केलं असून मनोरंजन सृष्टीतून तिच्यावर शुभेच्छा व कौतुकाचा वर्षाव होत आहे.
