अभिनेत्री अमृता खानविलकर हिने आजवर तिच्या अभिनयशैलीने प्रेक्षकांच्या मानवर राज्य केलं. मालिका, चित्रपट, वेबसीरिजच्या माध्यमातून अमृताने प्रेक्षकांच्या मनात घर केलं. अमृताच्या सौंदर्याचे तर लाखो दिवाने चाहते आहेत. केवळ मराठीच नाही तर हिंदी सिनेसृष्टीतही अमृताने आपल्या अभिनयाच्या जोरावर छाप पाडली. सोशल मिडियावरही अमृता नेहमीच सक्रिय असते. अशातच अमृता सध्या तिच्या ‘लुटेरे’ या वेबसीरिजमुळे चर्चेत आलेली पाहायला मिळत आहे. (Amruta Khanvilkar Incident)
या वेबसीरिजच्या चित्रीकरणादरम्यानचा एक किस्सा अभिनेत्रीने नुकत्याच दिलेल्या मुलाखतीत सांगितला आहे. अमृताने मिड डेला दिलेल्या मुलाखतीत एक भयावह किस्सा सांगितला आहे. हा किस्सा सांगत अमृता म्हणाली, “दक्षिण आफ्रिकेत आम्ही ज्या ठिकाणी चित्रीकरण करत होतो ती जागा म्हणजे पृथ्वीवरचा सर्वात मोठा स्लम एरिया होता. जसा धारावी परिसर आपल्या आशियात सर्वात मोठा आहे, अगदी तसाच दक्षिण आफ्रिकेतील तो भाग पृथ्वीवरची सर्वात मोठी झोपडपट्टी म्हणून ओळखला जातो”.
अमृता पुढे म्हणाली, “तेथील आफ्रिकन लोकसुद्धा बंदुका घेऊन फिरत होती. माझा चित्रीकरणाचा पहिलाच दिवस होता. मी व्हॅनमध्ये बसले होते आणि त्या व्हॅनच दार मी उघडं ठेवलं कारण, मला प्रचंड गरम होत होतं. तेवढ्यात सेटवरचा एक मुलगा पळत आला आणि म्हणाला, मॅडम तुम्ही प्लीज सगळं बंद करुन बसा. तुम्हाला इथून किडनॅप करुन घेऊन जातील आणि आम्ही काहीच करु शकणार नाही. आता हे सांगणं खूप सोपं आहे. पण, तेव्हा माझ्या मनात खरंच एक भीती निर्माण झाली होती”.
अभिनेत्री पुढे म्हणाली, “करोनादरम्यान आमचं चित्रीकरण सुरु असल्याने तेव्हा तिथेही आर्थिक चणचण होती. अगदी अलीकडच्या काळात आफ्रिकेतील निर्बंध उठवण्यात आले आहेत. त्या भागात माफिया, गुन्हेगारी, बेरोजगारी मोठ्या प्रमाणात आहे. अशा ठिकाणी चित्रीकरण करण्याचा अनुभव काहीतरी वेगळाच होता. कारण, आपण भारतात खरंच खूप जास्त सुखी आहोत. आपल्याला जे पाहिजे ते आपण बोलू शकतो, आपल्याला हवं तिथे फिरु शकतो पण त्या ठिकाणी एवढ्या सोयीसुविधा नव्हत्या”, असंही ती म्हणाली.
