Aditi Dravid Struggle : कलाकार मंडळी कलाविश्वात काम मिळण्यासाठी बरीच धडपड करतात. बरेचदा ही मंडळी ऑडिशनसाठी वेळ घालवताना दिसतात. पण प्रत्येक ऑडिशनमधून त्यांना काम मिळेलच असं नाही. आणि म्हणूनच ते त्यांचे प्रयत्न करत असतात. बरेचदा सिलेक्शन न झाल्याने काहीसा त्यांचा हिरमोडही होतो. मात्र न खचता पुन्हा एकदा त्याचे जोमाने ही मंडळी त्यांचे प्रयत्न सुरु ठेवतात. काही वेळा देव परीक्षा घेतोय की काय असंही अनेकांना वाटत असतं. असंच काहीसं घडलं आहे अभिनेत्री अदिती द्रविडसह. अदितीने नुकत्याच दिलेल्या मुलाखतीत ऑडिशनबाबत भाष्य केलं. आजवर अदितीने अनेक मराठी मालिका, चित्रपट यांमध्ये काम केलं. आता अदिती ‘का रुसली रखुमाई’ या नाटकांतून रंगमंच गाजवताना दिसत आहे.
अदितीने ‘मज्जा पिंक’च्या ‘मनातला देव’ या पॉडकास्टला हजेरी लावली. यावेळी तिने अध्यात्माची बाजू सांगितली. तेव्हा बोलताना अदिती म्हणाली, “जेव्हा पहिल्यांदा ऑडिशनसाठी मला बोलावलं होतं, तर मी त्याच्या आधी पुण्यातून खूप नाटक, फिरोदिया, पुरुषोत्तम वगैरे सगळं करत होते. त्यामुळे त्या अनुषंगाने मी इथल्या लोकांना किंवा कास्टिंगच्या लोकांना माहिती होते. आणि त्यामुळे मला पहिल्यापासूनच ना, फॉर्च्युनेटली (टच वूड), खूप चांगल्या ऑडिशन्ससाठीच बोलावलं गेलं किंवा लीडच्याच ऑडिशनसाठी नेहमी बोलावलं गेलं. आणि आजपर्यंत माझं कधीच सिलेक्शन झालं नाहीये, कारण तुम्हाला माहितीये आतापर्यंतची माझी सगळी पात्रं जी मी साकारली आहेत ती प्रेक्षकांपुढे आहेत. पण राईट फ्रॉम माय फर्स्ट ऑडिशन टिल टुडे, मी दरवेळेला लीडसाठी ऑडिशन म्हणून मला बोलावतात, फायनल २ पर्यंत होते आणि माझं वर्कआउट होत नाही. त्यामुळे मी प्रत्येकवेळेला देवाशी भांडलेली आहे की यार, या वेळेस पण नाही झालं! म्हणजे बरं असं असतं की तुझं काम नाही आम्हाला आवडलं, तर पुढच्या वेळेला अजून चांगलं काम करून येता येईल”.
आणखी वाचा – “स्वतःच्या मुलाला पायावर उभं का नाही केलं?”, कॉमेडियनचा थेट अमिताभ बच्चनला सवाल, रोस्ट करणं पडणार महागात?
पुढे ती म्हणाली, “पण आता तू कॅरेक्टरला जात नाहीयेस, तू लूकला जात नाहीयेस. एका पॉईंटला मला कळलं की मी देवाशीही भांडणं चुकीचं आहे, कारण तो तरी कायच करणार आहे. त्याने मला एका विशिष्ट पद्धतीने बनवलेलं आहे. मी अशी आहे, मी छान दिसते जशी दिसते तशी. आता समोरच्याला मी कशी दिसायला हवीये, हे माझ्या हातात नाहीये आणि देवाच्याही हातात नाहीये. ते वन्स अँड फॉर ऑल त्याने एक बनवून पाठवलेलं आहे मॉडेल खाली, आता त्याच्यामध्ये काही होऊ शकत नाही. त्यामुळे आता माझी देवा सोबतची भांडणं खूप कमी झाली आहेत, कारण आता आम्ही… म्हणजे मी त्याला फक्त एक कॅज्युअली जाऊन सांगते की हॅलो, आज पण नाही झालं, इट्स ओके पण…”.
