मुंबईत घर घेण्याचं प्रत्येकाचं स्वप्न असतं. आणि हे स्वप्न प्रत्येकजण पूर्ण करण्यासाठी धडपडत असतो. सर्वसामान्यांपासून ते अगदी कलाकार मंडळींपर्यंत प्रत्येकजण या स्वप्नपूर्तीच्या मागे असतो. गेल्या वर्षभरात तर अनेक कलाकार मंडळींनी नवं घर घेतलं असल्याची आनंदाची बातमी चाहत्यांसह शेअर केलेली पाहायला मिळाली. अक्षय केळकर, मंगेश देसाई, अश्विनी महांगडे, प्रसाद ओक, गिरीजा प्रभू, मयुरी वाघ या कलाकार मंडळींनी स्वतःच नाव घर घेत चाहत्यांसह आनंदाची बातमी शेअर केली. या कलाकारांपाठोपाठ आता आणखी एका अभिनेत्रीने नवं घर घेतलं असल्याची गुडन्यूज चाहत्यांसह शेअर केली आहे. (Aditi Dravid Baught New Home)
नवीन घर खरेदी केलेल्या कलाकारांच्या यादीत आणखी एका अभिनेत्रीचं नाव जोडलं आहे. या अभिनेत्रीने छोट्या पडद्यावर महत्त्वपूर्ण भूमिका साकारत प्रेक्षकांच्या मनावर राज्य केलं आहे. ही अभिनेत्री म्हणजे अदिती द्रविड. अक्षय्य तृतीयेच्या शुभ मुहूर्तावर अदितीने ही आनंदाची बातमी चाहत्यांसह शेअर केली आहे. अदितीने मुंबईत स्वतःच हक्काचं नवं घर घेतलं असल्याची बातमी चाहत्यांसह शेअर केली आहे.
इन्स्टाग्राम अकाउंटवरुन खास पोस्ट शेअर करत तिने घरची पहिली झलक चाहत्यांसह शेअर केली आहे. अदिती सोशल मीडियावर बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात राहत असते. अशातच तिने नव्या घराची झलक दाखवणारे काही फोटो पोस्ट केले आहेत. पहिल्या फोटोमध्ये गृहप्रवेश पूजन आणि दुसऱ्या फोटोमध्ये नव्या घराचा खोली क्रमांक ८०१ असल्याचं पाहायला मिळत आहे.
“फायनली आय सेड येस टू मुंबई…माझं स्वत:चं घर, स्वप्नपूर्ती!” असं कॅप्शन देत तिने हे खास फोटो शेअर केले आहेत. अभिनेत्रीच्या या पोस्टवर सिनेसृष्टीतून कौतुकाचा वर्षाव करण्यात येत आहे. समीर परांजपे, सुकन्या मोने, समृद्धी केळकर, पूजा बिरारी, अभिजीत खांडकेकर, सावनी रविंद्र या कलाकारांनी पोस्टवर कमेंट्स करत अदितीला नव्या घरासाठी शुभेच्छा दिल्या आहेत.