१००व्या अखिल भारतीय मराठी नाट्यसंमेलनाला मनसे अध्यक्ष राज ठाकरे यांनी मराठी कलाकरांना लगावलेले बोल विशेष चर्चेत राहिले. कलाकारांनी एकमेकाला मान न देण्यावरुन त्यांनी चांगलंच खडसावलं. यावेळी बोलताना टोपणनावाचा मुद्दा अधोरेखित करत त्यांनी, “पहिली व शेवटची गोष्ट ती म्हणजे तुम्ही एकमेकांना मान दिला नाहीत, तर लोक तुम्हाला मान का देतील? तुम्ही एकमेकांना लोकांसमोर, अद्या, फद्या, शेळ्या, मेंढ्या, अंड्या अशा काही नावांनी हाका मारता. आज मराठीमध्ये बरेच कलावंत आहेत. पण मराठी चित्रपटांना स्टार नाही.” असं ते म्हणाले होते. यावर बऱ्याच कलाकार मंडळींनी भाष्य करत आपापलं मत मांडलेलं पाहायला मिळालं. (Vijay Patkar On Raj Thackeray Statement)
अशातच बऱ्याच मराठी, हिंदी चित्रपटांमधून प्रेक्षकांच्या मनावर अधिराज्य गाजवणारे अभिनेते विजय पाटकर यांनी नुकतीच इट्स मज्जाला मुलाखत दिली. यावेळी त्यांनी सिनेइंडस्ट्रीबाबत बरंच भाष्य केलं. दरम्यान त्यांनी राज ठाकरे यांच्या वक्त्यव्याला दुजोरा दिलेला पाहायला मिळाला. याबाबत बोलताना विजय पाटकर म्हणाले, “अगदी बरोबर आहे. राज साहेबांचं बोलणं अगदी बरोबर आहे. आपली मराठी इंडस्ट्री सगळ्यात मागे आहे त्याच हे एक कारण आहे. तुम्ही सगळ्यांसमोर पट्या, वाड्या, पटक्या, अंड्या अशी हाक मारता, त्यामुळे तुमचे हे नट लोकांना वाटतंच नाहीत. तुमचे नट मोठे वाटत नाही”.
पुढे ते म्हणाले, “बरोबर आहे. मी तर असं म्हणेन की हा व्यावहारिक नाही तर व्यावसायिक विषय आहे. हे अंड्या वगैरे तुम्ही बोलता पण अभिनय केल्यानंतरही तुम्ही त्यांच्याशी तसेच वागता, त्यांची भंकस करता, त्यामुळे व्यावसायिक बाजू येते तेव्हा तुम्ही मागे पडता. काळ नाटकाच्या शोला तुम्ही भंकस केली, परत तेच सेटवरही असतं. काम करा, कामाकडे फोकस करा कारण निर्मात्याचे पैसे लागलेले असतात. शूटच्या वेळेला केलेली भंकस करण्यात जो वेळ जातो तेव्हा निर्मात्याचे त्यामागे पैसे असतात, वेळ वाढली की त्याचे पैसे वाढतात. दहा, पंधरा मिनिटे भंकस हा वेगळा विषय आहे पण आजकाल तासनतास भंकस केल्या जातात”.
यापुढे ते किस्सा सांगत असंही म्हणाले की, “मी लक्ष्मीकांत बेर्डेला कधीच लक्ष्या हाक मारली नाही, मी त्याला लक्ष्मी हाक मारायचो. सुपरस्टार आहे तो. त्याला भेटायला बाहेर रांग लागलेली असायची. फक्त एक राज साहेब म्हणाले की, अशोक मामांना मामा का हाक मारता. मामा हा आदर आहे. आपण नात्यांमध्ये बोलतोच की ताई, माई, मामा, काका पण ती हाक आदरार्थी असते. सुधीर जोशी वयाने मोठे होते आम्ही त्यांना सुधीर दादा हाक मारायचो, काही काहीजण टकल्या वगैरे काही म्हणायचे. ही बॉम्ब केवळ मराठी सिनेसृष्टीत आहे हिंदीत नाही. साऊथला तर अजिबातच नाही”.
