गेल्या काही दिवसांत हिंदीसह मराठीतील अनेक कलाकार लग्नाच्या बंधनात अडकले. प्रसाद जवादे व अमृता देशमुख या जोडीच्या लग्नाच्या अनेक चर्चा सोशल मीडियावर रंगल्या. त्यांचे अनेक फोटो सोशल मीडियावर व्हायरल झाले. अशातच अभिनेत्री सुरुची अडारकार व अभिनेता पियुष रानडे यांनी एकमेकांबरोबर लग्नगाठ बांधली. सोशल मीडियावरील त्यांच्या लग्नाचे फोटो पाहून साऱ्यांनाच धक्का बसला. सुरुची-पियुष यांच्या मेहंदी व हळदी समारंभाचे अनेक फोटो सोशल मीडियावर व्हायरल झाले. त्यांच्या लग्नाच्या रिसेप्शनच्या लूकमधील फोटोंनासुद्धा चाहत्यांकडून उत्तम प्रतिसाद मिळाला. दोघांच्या लग्नाच्या फोटोंनी चाहत्यांसह अनेकांचे लक्ष वेधून घेतलं. (Piyush Ranade & Suruchi Adarkar)
सुरुची-पियुष यांनी इन्स्टाग्राम अकाऊंटद्वारे “आनंदाचा दिवस” असं म्हणत लग्नाचे काही खास क्षण चाहत्यांबरोबर शेअर केले होते. सुरुची-पियुष यांच्या नात्याविषयी कुणालीही कल्पना नव्हती. सुरुची-पियुष यांच्या लग्नाच्या फोटोंवर अनेकांनी कमेंट्सद्वारे शुभेच्छांचा वर्षाव केला. तर अनेकांनी त्यांना कमेंट्स करत संमिश्र प्रतिक्रियाडी व्यक्त केल्या. सुरुची-पियुष यांचे लग्न हे अगदी विधीवत झाले असले तरी त्यांच्या लग्नातील उखाणा काय होता? हे जाणून घेण्याची चाहत्यांची इच्छा होती, हीच इच्छा ‘इट्स मज्जा’ने पूर्ण केली आहे. नुकतीच ‘इट्स मज्जा’ने सुरुची-पियुष यांची केळवण स्पेशल अशी मुलाखत घेतली.
सुरुची-पियुष यांच्या केळवण स्पेशल मुलाखतीत त्यांनी त्यांच्या लव्हस्टोरीविषयी व त्यांच्या नात्याविषयी खुलेपणाने संवाद साधला. दोघांनी त्यांच्या लग्नाबद्दल तसेच त्यांच्या नात्याबद्दलच्या अनेक गोष्टींचा खुलासा केला. सुरुची-पियुष यांची लव्हस्टोरी नेमकी कशी सुरु झाली?, त्यांच्या नात्यात नेमका कुणी पुढाकार घेतला? याबद्दल दोघांनीही भाष्य केले आहे. यावेळी पियुषने आपल्या लाडक्या पत्नीसाठी खास उखाणा घेतला.
सुरुचीला झोप ही अत्यंत प्रिय असून याच झोपेशी निगडीत त्याने त्याच्या गंमतीशीर अंदाजात सुरुचीचे नाव घेत हटके उखाणा घेतला. यावेळी पियुषने “नवीन आयुष्य, लावूया नवीन रोप, नवीन आयुष्य, लावूया नवीन रोप, सुरुचीला दुसरं काहीही नको, फक्त हवी असते दुपारची छान झोप” असं म्हणत हटके उखाणा घेतला. लग्नातही पियुषने हाच उखाणा घेतला असल्याचं सांगितलं. दरम्यान सुरुची-पियुष आता त्यांच्या वैवाहिक आयुष्याला सुरुवात झाली असून दोघे एकमेकांबरोबर आनंदी असल्याचे पाहायला मिळत आहे.